Astanada mektep oqýshylary aıaldamadaǵy kamerany qıratqan
ASTANA. KAZINFORM — Astanada 7-synypta oqıtyn eki oqýshy qoǵamdyq múlikti búldirdi. Olar Dáýren kóshesindegi aıaldamada ornatylǵan beınebaqylaý kamerasyn qasaqana zaqymdaǵan.
Polıtsııa qyzmetkerleri oqýshylarmen profılaktıkalyq jumys júrgizip, qoǵamdyq múlikti búldirgeni úshin zańda kózdelgen jaýapkershilikti túsindirdi. Sondaı-aq beınebaqylaý kameralarynyń qoǵamdyq oryndardaǵy qaýipsizdikti qamtamasyz etýdegi mańyzy aıtyldy.
Oqıǵaǵa baılanysty oqýshylardyń ata-analaryna da qatysty zań aıasynda shara qoldanyldy.
Polıtsııa qoǵamdyq jáne bótenniń múlkin qasaqana búldirý nemese joıý zańǵa qaıshy ekenin eskertti. Kámeletke tolmaǵandardyń quqyq buzýshylyqtary úshin olardyń ata-analary men zańdy ókilderi de jaýapkershilikke tartylýy múmkin.
Eske salaıyq, buǵan deıin jyl basynan beri Astanada 94 adam vandalızm úshin jaýapkershilikke tartylǵanyn jazǵanbyz.
