Astanada mektep qurylysyna 16,9 mlrd teńge bólindi

NUR-SULTAN. QazAqparat – Bıyl elordada jańa mektepter salýǵa bıýdjetten 16,9 mlrd teńge qarjy bólindi. Bul týraly Nur-Sultan qalasy qurylys basqarmasynyń basshysy Ársen Jańǵasqanov málim etti, dep habarlaıdy QazAqparat tilshisi.

«Bıyl elordada mektep qurylysyna 16,9 mlrd teńge bólindi. Búginde 6 mektep salynyp jatyr jáne 5 mekteptiń jobasy aıaqtalýǵa jaqyn. Odan bólek, 20 mektep salý jospary tur. Osy oraıda jergilikti bıýdjetten 12 mln teńge surap otyrmyz. Isataı batyr jáne Naýryzbaı batyr kósheleriniń qıylysyndaǵy mektep qurylysy týraly aıtyp ótsem: jer bólindi, bıyl josparlaýdy aıaqtap, kelesi jyly mektep qurylysyn bastaımyz», - dedi Ársen Jańǵasqanov máslıhat otyrysynda.

Eske sala ketsek, taıaýda ǵana elorda ákimdigi birqatar turǵyn úı kesheniniń qurylysy boıynsha usynystardy qabyldamaı, ornyna mektep-gúlzarlar salynatyn boldy.

Atap aıtqanda, Baıtursynuly kóshesi, 7 («Haıvıll» turǵyn úı kesheni) mekenjaıyndaǵy ýchaskede kóppáterli turǵyn úıdiń ornyna mektep boı kóteredi.

Sondaı-aq, «Atameken» ulttyq kásipkerler palatasy habarlaǵandaı, astanalyq kásipkerler jańa balabaqsha, mektep salýǵa daıyn ekendikterin jetkizdi.