Astanada mektep dırektorlary kireberiste otyrady
Negizgi maqsat - bastyqtardyń kabınetterin ońtaılandyryp, bıýdjet shyǵyndaryn barynsha qysqartý. Aktsııanyń alǵashqy kezeńinde mektep dırektorlarynyń kabınetteri tekserildi, dep xabarlaıdy QazAqparat tilshisi.
Astana qalalyq departamentiniń basshysy Jazıra Jylqyshıevanyń aıtýynsha, búginde kóptegen basshylardyń kabınetteri tym úlken. Oǵan qosa, joǵary qabattarda ornalasqan. Sonyń saldarynan xalyqpen jaqyn baılanys joq. Osyǵan baılanysty «Jańa format» aktsııasy qolǵa alynyp, alǵashqy kezeńde mektep dırektorlarynyń kabınetteri tekserildi.
«Mysaly, 90 sharshy metrdi quraıtyn qabyldaý, tynyǵý jáne qonaqtarmen kezdesý bólmeleri bar. Oǵan qosa, esep-qısap pen kadr bólimderiniń keń kabınetteri kezdesti. Negizi, zań boıynsha mektep basshylyǵynyń kabıneti 32 sharshy metr bolýy kerek. Al qabyldaý bólimi 12 sharshy metrde ornalasýy shart. Astana mektepterinde atalǵan normalar saqtamaıdy. Máselen, №54 mektep-lıtseıde dırektor 90 sharshy metrdi qamtıtyn jumys, demalys jáne qabyldaý bólimderin bosatyp berdi. Qazir ol jerde muǵalimderge arnalǵan jumys bólmesi ornalasty. Dırektordyń jańa kabıneti 13 sharshy metr boldy. Sol sııaqty 17-shi mektep-dırektorynyń kabınetin 40 sharshy metr bolsa, qazir ol birinshi qabatqa aýystyryldy. Burynǵy kabınette oqýshylar robototexnıka jáne shyǵarmashylyq shyńdaý boıynsha bilim alýda», - dedi J.Jylqyshıeva.
Onyń sózine qaraǵanda, №80 mektep-gımnazııasynyń dırektory da jańa aktsııany qoldady. Ol 53 sharshy metrdi bosatyp berdi. Qazir ol jerde qosymsha sabaqtar ótip jatyr. 71-shi mektep-lıtseı de solaı. Dırektory 50 sharshy metrdi bosatyp, birinshi qabatqa kóshti.
«Búginde atalǵan mektepterdiń basshylyǵy astynda otyryp, bárin kórip otyrady. Oqýshylardyń kirgenin-shyqqanyn jáne basqa da jaǵdaılardy baqylaýǵa múmkindik bar. Halyqqa jaqyn bolý degen osy. «Osyny ózderińiz oılamadyńyz ba?» dep surasaq, joq deıdi», - dep atap kórsetti J.Jylqyshıeva.