Astanada mektep bitirýshi túlekterdiń «Elorda maqtanyshy-2023» forýmy ótti
Shara barysynda alǵash bolyp sóz alǵan QR Parlamenti Senatynyń tóraǵasy Máýlen Áshimbaev Prezıdent Qasym-Jomart Toqaevtyń túlekterge arnalǵan hatyn oqyp berdi.
«Qurmetti túlekter, barshańyzdy «Elorda maqtanshy» forýmynyń bastalýymen shyn júrekten quttyqtaımyn! Bul mektep bitirip, jańa ómirge qadam basqaly turǵan túlekter úshin aıtýly oqıǵa. Sizderdiń aldaryńyzdan san taraý jol, orsan zor múmkindikter ashylady. Memleket óskeleń urpaqtyń bilimdi, eńbekqor, otanshyl bolyp ósýi úshin barlyq jaǵdaıdy jasaıdy. Sizder uly Abaıdyń paıda oılama, ar oıla talap qyl artyq bilýge degen ósıetin berik ustanasyzdar dep senemin. Sonda biz kópke ilesetin emes, kóshti bastaıtyn el bolamyz», - delingen Máýlen Áshimbaev oqyp bergen Memleket basshysynyń hatynda.
Elorda ákimi Jeńis Qasymbektiń málimdeýinshe, 25 jyldyń ishinde Astana boıynsha 2300 túlek «Altyn belgige» ıe bolǵan. Onyń ishinde bıyl 280 túlek «Altyn belgi» jáne 607 bala úzdik attestat aldy.
«Búgin sizder úlken ómirge qadam basyp, ary qaraı nyq qadam jasaısyzdar. Ózderińiz sekildi jigerli, aqyldy, bilimdi jastar alǵa qoıǵan maqsattaryn oryndap, úlken jetistikterge mindetti túrde qol jetkizedi.Biz sizderdi maqtanyshpen «elorda túlekteri» dep ataımyz. Qalamyzda oqýshylarǵa sapaly bilim berý úshin barlyq jaǵdaılar jasalǵan. 25 jyldyń ishinde 2300 túlek «Altyn belgi» tós belgisine ıe boldy. Bıylǵy jyly 280 túlek «Altyn belgi» jáne 607 úzdik attestatymen marapattalyp otyr. Bul – ustazdaryńyz ben ózderińizdiń eńbekterińizdiń jemisi dep bilemin. Úlken ómirdiń jańa paraǵyn ashqaly otyrǵan sizderge asyl arman, taýdaı talap, kemel bilim, jarqyn bolashaq tileımin!», - dedi Jeńis Qasymbek.
9 500 den astam úzdik astanalyq túlek qatysqan aýqymdy shara kontserttik baǵdarlamaǵa jalǵasty.
