Astanada mektep avtobýsyna qyzyǵýshylyq tómen - Astana LRT
ASTANA. QazAqparat - «Astana LRT» JShS Basqarma tóraǵasynyń orynbasary Beıbit Esjanov «Mektep bus» jobasynyń tujyrymdamasy qashan daıyn bolatynyn aıtyp berdi, dep habarlaıdy QazAqparat tilshisi.
«Mektep bus» jobasy - qala kóshelerindegi kólikterdi azaıtýdyń bir amaly. Tańerteń qala kóshelerin lyq toltyrǵan kólikterdiń 40 paıyzy - balalaryn mektepke apara jatqan ata-analardyń kóligi. Sondyqtan, «Mektep bus» jobasynyń kontseptsııasyn ázirleý máselesi óte mańyzdy. Búgingi kúni jobanyń birneshe kontseptsııasyn ázirledik. Atalmysh kontseptsııalardy ákimdikke tanystyramyz. Másele mynada: eń aldymen jobany kim qarjylandyrady? Balalardy avtobýspen tasyǵany úshin sýbsıdııa berile me, joq pa? Sondyqtan, atalmysh suraqqa qatysty naqty jaýabymyz joq», - deıdi Beıbit Esjanov Astanada ákimdiginde ótken baspasóz máslıhatynda.
Onyń aıtýynsha, qala ákimi Baqyt Sultanov «Mektep bus» jobasynyń túpkilikti kontseptsııasyn ázirleý jumysyn osy jyly aıaqtaýdy tapsyrǵan.
«Kontseptsııany túpkilikti aıaqtaǵannan keıin mindetti túrde tanystyramyz. Qazir 50 paıyzyn ata-analar, qalǵan 50 paıyzyn ákimdik tóleýi múmkin degen áńgimeniń ras-ótirigi týraly eshteńe aıta almaımyz. Sebebi, bári esepteýde anyqtalady», - deıdi ol.
Beıbit Esjanov óz sózinde buryn da «Mektep bus» jobasy iske qosylyp, balalardyń arnaıy avtobýspen tasymaldanǵanyn aıtty.
«37 mektepti aralap, usynystarymyzdy bildirgenimizben, eki avtobýsqa ǵana suranys boldy. Ata-analar balalaryn arnaıy avtobýspen tasymaldaýǵa asa qyzyǵýshylyq tanytyp otyrǵan joq. Kontseptsııany ázirleýde munyń bárin eskerip otyrmyz», - deıdi ol.
Eske sala ketsek, «Astana LRT» JShS jýyq arada «Mektep bus» jobasy aıasynda qaıtadan arnaıy avtobýstar shyǵarǵaly jatqanyn habarlaǵan bolatynbyz.
