Astanada medıtsınalyq termınderdi birizdendirý máselelerinpe qatysty respýblıkalyq dóńgelek ústel ótedi
ASTANA. QazAqparat - Qazaqstan Respýblıkasy Mádenıet jáne sport mınıstrliginiń Tilderdi damytý jáne qoǵamdyq-saıası jumys komıteti Sh.Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵymen birlese otyryp, 2015 jylǵy 12 maýsymda «Medıtsınalyq termınderdi birizdendirýdiń normatıvtik-lıngvıstıkalyq negizderi» atty respýblıkalyq dóńgelek ústel ótkizedi.
Bul týraly Sh.Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵynyń baspasóz qyzmeti habarlady.
Qazaqstan Respýblıkasynda Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynda belgilengen maqsat-mindetterdiń biri termınologııalyq leksıkany birizdendirý, qazaq termınderiniń rettelgen qoryn qalyptastyrý bolyp tabylady. Termınologııalyq qordy jetildirý salalyq termınderdiń sapasyn arttyrýmen, sondaı-aq termıntaný men termınografııa jónindegi arnaıy jumystardy jandandyrýmen tikeleı baılanysty.
Búgingi tańda medıtsına salasynyń termınderin júıeleýge jańa talaptardy ázirleý, termınderdi birizdendirý, olardy qazaq tiliniń normalaryna sáıkes retke keltirýge qatysty máseleler týyndap otyr.
Osy rette medıtsınalyq termınologııadaǵy qordalanǵan máselelerdi talqylaý maqsatynda is-sharaǵa Qazaqstan Respýblıkasy Parlamentiniń depýtattary, Qazaqstan Respýblıkasy Úkimetiniń janyndaǵy Respýblıkalyq termınologııa komıssııasynyń músheleri, til jáne medıtsına salasynyń ǵalymdary, ortalyq atqarýshy organdardaǵy til salasyna jaýapty qurylymdardyń basshylary men mamandary, BAQ ókilderi jáne t.b. shaqyrylyp otyr.
Dóńgelek ústel qorytyndysy boıynsha sheshimder qabyldanyp, tıisti memlekettik organdar men mekemelerge usynystar beriletin bolady.
