Astanada medıtsınalyq saqtandyrýdyń negizgi baǵyttary túsindirildi
ASTANA. QazAqparat - Búgin elorda ákimdiginde qala basshysy Áset Isekeshevtiń tóraǵalyǵymen mindetti áleýmettik medıtsınalyq saqtandyrý júıesin engizý jóninde aqparattyq-túsindirme jumystary boıynsha keńeıtilgen jınalys ótti, dep habarlaıdy ákimniń resmı saıty.
Jınalys jumysyna QR Densaýlyq saqtaý mınıstri Eljan Birtanov, aýdan ákimderi, qalalyq vedomstvo basshylary, medıtsınalyq mekemeler men bıznes qaýymdastyǵynyń ókilderi qatysty.
«Qazaqstanda 1 shildeden bastap resmı túrde mindetti áleýmettik medıtsınalyq saqtandyrý júıesi engizildi. Alǵash bolyp áleýmettik medıtsınalyq saqtandyrý qoryna jumys berýshiler men jeke kásipkerler tólem júrgize bastady. Turǵyndar medıtsınalyq kómekti 2018 jyldyń qańtarynyn bastap mindetti medıtsınalyq saqtandyrý júıesi arqyly ala bastaıdy. Bul reformanyń mańyzdylyǵy - ár Qazaqstan azamatynyń qyzyǵýshylyǵy qamtylady. Sol sebepti biz osy jınalysqa elordanyń bıznes ókilderin shaqyrdyq», - dedi ákim sharaǵa qatysýshylarǵa.
Óz kezeginde Qazaqstan Respýblıkasynyń densaýlyq saqtaý mınıstri Eljan Birtanov medıtsınalyq qyzmettiń qoljetimdiligi men sapasyn arttyratyn eldegi júrgizilip jatqan bul reformanyń mańyzdylyǵy týraly aıtty.
«Eger búgin qazaqstandyqtardyń densaýlyǵyn zertteıtin bolsaq, biz jaqsy dınamıkany baıqaımyz. Mysaly, uzaq ómir súrý ulǵaıǵan, ana men bala ólimi azaıǵan degen sekildi negizgi kórsetkishter qýantarlyq. Buǵan qosa, turǵyndardyń qartaıýyna baılanysty aýrýlar qurylymy ózgerýde. Búginde aqsha ekvıvalentinde medıtsınalyq qyzmetti tutyný artýda», - dep atap ótti mınıstr.
Mınıstr qazirgi qoldanystaǵy bıýdjettik modelmen salystyrǵanda mindetti áleýmettik medıtsınalyq saqtandyrý júıesiniń timdi tustary kóp: turǵyndardyń densaýlyǵyn qadaǵalaý salasynda teń jaýapkershilik saqtalady - memleket - jumys berýshi - azamat, qoljetimdilik teńdigi, áleýmettik baǵyttaýshylyq jáne MÁMS sıpaty.
Júıeni kezeńimen engizý turǵyndarǵa jańa reformaǵa kóshýge múmkindik beredi.
Naqtyraq aıtar bolsaq, 2017 jyldyń shildesinen bastap jumys berýshiler 1 % bólip otyrady, 2018 jyldan ár qyzmetkerdiń eńbekaqysynan 1,5%, 2020 jyldan - 2%, 2022 jyldan - 3% bólinedi.
Jumyskerlerdiń bólýi 2019 jyldan - 1%, 2020 jyldan -2% quraıdy. Ózin jumyspen qamtyǵandar, onyń ishinde jeke kásipkerler, mamandandyrylǵan medıatorlar, azamattyq-quqyqtyq kelisimsharty negizinde qarjy alatyn jeke tulǵa 1 shildeden 2 tómengi eńbekaqydan 5% bóledi (1% e.a.- 1414 teńge)
«Áleýmettik medıtsınalyq saqtandyrý qory» kommertsııalyq emes aktsıonerlik qoǵamy basqarmasynyń tóraıymyElena Bahmýtova talqylaý kezinde jınalǵandarǵa júıeniń barlyq kezeńi týraly jan-jaqty túsindirdi. Qor jetekshisi MÁMS aıasynda medıtsınalyq kómektiń qoljetimdiligi týraly aıtyp berdi. Budan bólek sarapshy mindetti erikti saqtandyrý men jeńildik qarastyrylǵan turǵyndar sanaty týraly baıandady.
«Eger adam jeńildik sanatynda bolsa, onda oǵan tólem jasaýdyń qajeti joq, jeke kásipker de AQK boıynsha da tólem júrgizbeıdi. Memleket bul mindetti ózine alady», - dep málimdedi qor jetekshisi.
Jańa júıe «múmkindiginshe tóleý - qajettilik boıynsha alý» prıntsıpi boıynsha jumys isteıdi, dep aıaqtady Bahmýtova.
Jınalys qortyndysy boıynsha qatysýshylar qyzyqtyrǵan suraqtarǵa tolyq jaýap aldy.
