Astanada medıtsınalyq qyzmet basshylarynyń kýrstyq daıarlyǵy aıaqtaldy

ASTANA. 1 aqpan. QazAqparat - Astanada Qazaqstan Respýblıkasy Qarýly Kúshteriniń Qurlyqtaǵy áskeriniń medıtsınalyq qyzmet quramalary men bólimderiniń, áskerı-emdeý mekemeleri basshylarynyń kýrstyq daıarlyǵy aıaqtaldy, dep habarlady QR Prezıdenti janyndaǵy Ortalyq kommýnıkatsııalar qyzmeti Qorǵanys mınıstrligine silteme jasap.

«Áskerı dárigerler on kún boıy alǵa qoıǵan tapsyrmalardy jiktep talqylap, jas mamandarǵa emdeý jáne profılaktıkalyq jumystardyń qazirgi zamanǵy ádistemelerin úıretti», - delingen habarlamada.

Aqparatqa qaraǵanda, mamandar qazirgi zamanǵy áskerılerdi emdeý-evakýatsııalaý júıesiniń, jedel medıtsınalyq kómek kórsetý, áskerı-medıtsınalyq bólimsheler men mekemelerdiń jumysyn uıymdastyrý máselelerin qarastyrǵan.

Óńirlik medıtsınalyq qyzmet basshylary QR Qorǵanys mınıstrliginiń jańa qondyrǵylarmen jaraqtandyrylǵan Bas áskerı klınıkalyq gospıtalinde bolyp, «Astana medıtsına ýnıversıteti» AQ Oqý-klınıkalyq ortalyǵynda medıtsına salasyndaǵy jańa tehnologııalarmen tanysty.

Shara sońynda medıtsınalyq qyzmet basshylary emtıhan tapsyryp, kýrstyq daıarlyqtan ótkendigi týraly sertıfıkat aldy. «Osy kúnderi olar teorııa men praktıkany ushtastyra otyryp, óz bilimderin jetildirdi, endi qyzmet ornyna qaıtysymen, óz tájirıbelerin áriptesterimen bólisetin bolady», - delingen baspasóz qyzmeti habarlamasynda.