Astanada medıtsınalyq qujattardy qoldan jasaǵan qylmystyq top ustaldy
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamentiniń jetekshisi Shyńǵys Qabdolanyń aıtýynsha, osydan úsh kún buryn elordada sybaılas jemqorlyqqa qarsy kúres qyzmetkerleri medıtsınalyq qujattardy qoldan jasaǵan qylmystyq topty quryqtady.
«Tintý kezinde 086 úlgisindegi medıtsınalyq anyqtamanyń 200-den astam blankileri, 190-ǵa jýyq sanıtarlyq kitapsha, medıtsınalyq mekemeler men dárigerlerdiń 80-nen astam mórleri, medıtsınalyq analızderdiń nátıjeleri, flıýrografııalyq sýretter, medıtsınalyq dıagnozdar jazylǵan kitapsha jáne taǵy basqa zattar tárkilendi. Qazir sotqa deıingi tergeý amaldary júrgizilýde», - dedi Sh.Qabdola Astanada ótken baspasóz máslıxatynda.
Onyń aıtýynsha, jalǵan medıtsınalyq qujattardy satyp alǵandar óz densaýlyǵyna ǵana emes, aınaladaǵy adamdardyń ómirine de qaýip tóndiredi. Sebebi medıtsınalyq qujattardy izdeıtin adamdar, kóp jaǵdaıda, qoǵamdyq tamaqtaný, bilim berý jáne taǵy basqa áleýmettik mańyzy bar salalarda jumys isteıdi. Osy ýaqytqa deıin mektepke deıingi mekemelerge aýyr syrqaty bar adamdardy jumysqa alý faktileri de bolǵan.
«Biz bir ǵana qylmystyq topty ustadyq. Bilýimizshe, ondaı toptar áli de bar. Sondyqtan jalǵan medıtsınalyq qujattardy jasaý faktileri jaıynda shuǵyl bizge xabar berýdi suraımyz», - dep atap kórsetti Sh.Qabdolla.