Astanada medıtsına uıymdary Jańa jyl merekesinde qalaı jumys isteıdi
NUR-SULTAN. QazAqparat – Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov medıtsına uıymdary Jańa jyl meıramynda qalaı jumys isteıtindigin aıtty, dep habarlady QazAqparat tilshisi.
«Osy múmkindikti paıdalana otyryp, azamattarǵa medıtsınalyq uıymdardyń aldaǵy jańajyldyq merekede qalaı jumys isteıtinin habarlaǵym keledi. Alǵashqy medıtsınalyq-sanıtarııalyq kómek uıymdarynda mereke kúnderi halyqqa medıtsınalyq kómekti kezekshi dárigerler kórsetedi. MSAK uıymdarynda patsıentterdi qabyldaý 1-4 qańtar jáne 7 qańtar kúnderi saǵat 8:00-den 18:00-ge deıin júzege asyrylady. Jalpy tájirıbe dárigerleriniń kezekshilikte bolatynyn eskeremin. Osylaısha merekelerde belgili bir sala mamandarynyń kómegine júginý múmkin bolmaıdy», - dedi basqarma basshysy qala ákimdiginde ótken baspasóz máslıhatynda.
Sondaı-aq,ol súzgi kabınetter, ambýlatorııalyq patsıentterge medıtsınalyq kómek kórsetetin mobıldi brıgadalardyń úzdiksiz jumysy, PTR ádisimen testileý jalǵasatynyn aıtty.
«Súzgi kabınetterde kezekshilik etetin dárigerler keste boıynsha tańǵy 8-den keshki 8-ge deıin jumys isteıdi. Ambýlatorııalyq patsıentterge qyzmet kórsetý saǵat 8:00-den 16:00-ge deıin júrgiziledi. Qala statsıonarlary jumys kúnderindegideı azamattardy táýlik boıy qabyldaıdy. Árıne, merekelik demalys kúnderin eskere otyryp, barlyq elordalyq aýrýhanalar rezervtegi beıindi palatalardy bóle otyryp, shuǵyl medıtsınalyq kómek kórsetý úshin kúsheıtilgen jumys rejımine kóshedi», - dedi Tımýr Muratov.
