Astanada medıtsına qyzmetkerlerine arnalǵan 3 jataqhana salynady

ASTANA. QazAqparat - Astanada akýsher-gınekolog, neonatolog, anestezıolog jáne reanımatolog sııaqty mamandardyń tapshylyǵy baıqalady, dep habarlaıdy ákimdiktiń saıty.

«Áıel densaýlyǵy - ult densaýlyǵy» taqyrybynda ótken dóńgelek ústelde Qoǵamdyq densaýlyq saqtaý basqarmasynyń basshysy Qamaljan Nadyrovtyń keltirgen málimetterine qaraǵanda, Astanada bala týý jasyndaǵy áıelderdiń sany 20 jylda 4,6 ese ósse, akýsher-gınekologtar sany 2,6 esege artqan.

«1998 jyly Astana qalasyndaǵy akýsher-gınekolog mamandarynyń sany 119 bolsa, búgin bul kórsetkish 320-ǵa jetip, 2,6 esege artqan. Bala kóterýge qabiletti áıelder sany 1998 jyly 70 myńdy qurasa, qazir olardyń sany 325 myńǵa deıin jetip otyr. Kórsetkish 4,6 esege artqan.  AMJJ-niń akýsher-gınekologtarmen qamtylý kórsetkishi shtattyq kesteniń 85% qurasa, statsıonarlyq deńgeıde akýsher-gınekologtardyń shtaty 90 % shamasynda», - dedi Q. Nadyrov.

Kadr tapshylyǵy máselesin sheshý maqsatynda qoǵamdyq densaýlyq saqtaý basqarmasy keshendi sharalardy qolǵa aldy.

«Mamandardyń tapshylyǵyna áser etetin faktorlardyń biri - Astanada baspananyń joqtyǵy. Tek bıyldyń ózinde turǵyn úı jaǵdaıyn jaqsartý úshin perzenthana mamandaryna 10 páter bólindi. Aldaǵy ýaqytta 1 500 páteri bar úsh jataqhana salynady dep  josparlanyp otyr. Sondaı-aq, baspanany qoljetimdi etý maqsatynda turǵyn úı sertıfıkattaryn berý máselesi de qarastyrylyp jatyr», - dedi K. Nadyrov.

Mundaı sertıfıkattar osy jyldyń jeltoqsanynda beriledi.