Astanada medıtsına qyzmetkerleri úshin baspana salynady
ASTANA. QazAqparat - Astanada medıtsına qyzmetkerleri úshin baspana salynatyn bolady. Bul týraly qalalyq Qoǵamdyq densaýlyq saqtaý basqarmasynyń basshysy Qamaljan Nadyrov ana men bala ólimi oqıǵalarynyń sanyn azaıtýǵa baǵyttalǵan sharalardy qabyldaý jónindegi qalalyq shtabtyń kóshpeli otyrysynda málim etti.
Astana ákimdiginiń resmı saıtyndaǵy aqparatqa sáıkes, 20 jylda elordada 287 myń sábı dúnıege kelgen. Osy jyldary ana men bala ólim-jitimin azaıtý maqsatynda shuǵyl sharalar qolǵa alyndy. Olardyń aıasynda elorda aýrýhanalaryndaǵy oryn sany arttyrylyp, kadr tapshylyǵy máselesi sheshildi, qyzmet kórsetý mamandary biliktilikterin kóterdi.
«Elorda turǵyndary sanynyń ósimin esepke ala otyryp, № 1 aýrýhananyń bazasynda 250 orynǵa arnalǵan jańa bosandyrý blogynyń qurylys jobasyn bastadyq. Sondaı-aq, № 2 kópbeıindi aýrýhanada oryn sanyn 185-ten 220-ǵa deıin arttyrý týraly sheshim qabyldadyq», - dedi Qamaljan Nadyrov.
Onyń aıtýynsha, kadr tapshylyǵyn joıý úshin Qoǵamdyq densaýlyq saqtaý basqarmasy elimizdiń jetekshi JOO-men yntymaqtastyq qarym-qatynas ornatqan. Qajetti mamandar memlekettik grant esebinen daıyndalyp jatyr.
«Mamandardyń tapshylyǵyna áser etetin faktorlardyń biri - Astanada turǵyn úıdiń joqtyǵy. Tek bıyldyń ózinde bosandyrý qyzmetiniń bilikti mamandaryna 11 páter bólindi. Aldaǵy ýaqytta medıtsına qyzmetkerlerine baspana salý josparlanýda. Sondaı-aq, baspanany qoljetimdi etý maqsatynda turǵyn úı sertıfıkattaryn berý máselesi de qarastyrylǵan», - dedi Q. Nadyrov.
Tájirıbeli mamandardan quralǵan mobıldi toptar quryldy. Olardyń quramynda bilikti akýsher-gınekologtar, qan tamyrlary hırýrgteri, anestezıolog-reanımatologtar bar. Tamyzda basqarma № 1 perınataldy ortalyq pen № 2 qalalyq aýrýhanany biriktirý arqyly № 2 qalalyq kópbeıindi aýrýhanany qurǵan bolatyn. Bul, óz kezeginde ekstragenıtaldy patologııasy bar áıelderge ýaqytyly jáne sapaly kómek kórsetýge múmkindik berdi.
Qamaljan Nadyrovtyń aıtýyna qaraǵanda, sońǵy jyldary ekstragenıtaldy patologııasy bar aıaǵy aýyr áıelderdiń mıgratsııasy artýda. Máselen, 248 áıeldiń 34% - basqa qalalardyń turǵyndary.
