Astanada medıatsııany damytý máselesi talqylanyp jatyr
ASTANA. QazAqparat - Astanada QR Kásipodaqtar federatsııasynyń uıymdastyrýymen «Eńbek qatynastaryndaǵy medıatsııa» atty semınar-keńes ótip jatyr, dep habarlaıdy QazAqparat tilshisi.
Medıatsııa taqyrybyna arnalǵan otyrysta eńbek quqyǵy, eńbek qatynastaryndaǵy kásipodaqtardyń róli, eńbek daýlaryn sheshý kezinde medıatsııa sharalaryn qoldaný jáne kásipodaqtardaǵy sheteldik medıatsııa tájirıbelerin zertteý máseleleri talqylanyp jatyr.
«Aǵymdaǵy jyly quqyqtyq bilim berýdi damytý aıasynda QR Joǵarǵy soty men Kásipodaqtar federatsııasy arasynda «Tatýlasý» ortalyǵyn qurý jóninde memorandýmǵa qol qoıyldy. Búginde sonyń aıasynda kásipqoı medıatorlarmen jáne sottarmen eńbek, áleýmettik jáne basqa da daýlardy sheshý boıynsha birlesken jumystar júrip jatyr. Sonymen qatar, kásipodaq uıymynyń bazasynda 16 aımaqta tatýlastyrý ortalyǵy men medıatsııa kabıneti ashyldy. Kásipodaq mamandary eńbek medıatsııasy isterin belsendi túrde qarastyrýda, óıtkeni medıatsııa - áleýmettik jáne eńbek daýlaryndaǵy konsensýstyń negizgi quraly», - dedi QR Kásipodaqtar federatsııasy tóraǵasynyń orynbasary Muhtar Tinikeev.
Onyń aıtýynsha, búginde sot júıesi men quqyq qorǵaý organdarynda medıatsııa qyzmeti alǵa qoıylǵan. Sondaı-aq, «Tatýlasý» ortalyǵynyń jumysyn odan ári damytyp, ınstıtýt qurý jumystary júrgizilip jatyr.
Semınar-keńes jumysyna QR Parlamenti depýtattary, QR Joǵarǵy sotynyń, QR Eńbek jáne halyqty áleýmettik qorǵaý mınıstrligi jáne kásipodaq uıymdary ókilderi men medıatsııa mamandary qatysýda.
«Bizde medıatsııa týraly zań 2011 jyly qabyldandy. Degenmen, onyń jumysy bıyl ǵana jandana tústi. Búginde «Tatýlasý» ortalyǵynan bólek ár oblystyq jáne aýdandyq sottyń janynan medıatsııa kabıneti jumys istep tur. Medıatorlardyń negizgi mindeti - daýdy sotqa jetkizbeı sheshý. Odan bólek, sotta kelisim komıssııasy jumys isteıdi. Sondaı-aq, halyqtyń sot salasyndaǵy saýatyn kóterý ortalyǵynyń da jumysyn aıtyp ótý kerek, sebebi azamattardyń óz quqyǵy men mindetin bilýi mańyzdy. Óz quqyǵyn jaqsy bilgen azamat eshqandaı quqyqbuzýshylyqtarǵa jol bermeıdi», - dedi QR Joǵarǵy sotynyń sýdıasy Baýyrjan Jumaǵulov.
Atalǵan shara Qazaqstan men Ózbekstandaǵy F.Ebert qorynyń qoldaýymen ótýde.
