Astanada medıatsııalyq ashyq esik kúni ótýde
ASTANA. QazAqparat - Astanada respýblıkalyq biryńǵaı medıatsııa kúnine oraı «Ashyq esik» sharasy uıymdastyrylýda, dep habarlaıdy QazAqparat tilshisi.
Medıatsııa - úshinshi, beıtarap, ádil, janjal nátıjesine múddeli emes taraptyń qatysýymen ótetin daýlardy retteýdiń jańa túri.
Ashyq esik kúni janjaldardyń aldyn alý jáne olardy sotqa jetkizbeı sheshý, sol sııaqty halyqtyń quqyqtyq saýattylyǵyn nyǵaıtýdy kózdeıdi.
Qazaqstanda 2011 jyly 5 tamyzda medıatsııa týraly zań qabyldandy, osy turǵyda jyl saıyn respýblıkalyq biryńǵaı «Medıatsııalyq ashyq esik» kúni ótkizilip keledi.
«Medıatsııa uǵymy qazaqqa jat emes. Bizdiń ata-babalarymyz burynnan daý-damaıdy ózara kelisimmen sheshe bilgen. Osy sebepti búgingi medıatsııa qyzmetiniń maqsaty- qos tarapty birdeı qanaǵanattandyratyn jáne daýlasýshylyq deńgeıin tómendetetin ózara tıimdi beıbit kelisimge keltirý. Medıatsııa barysynda «kináli» jáne «kinásiz» degen jaq bolmaıdy», - dedi Astana qalasynyń ákimdigi janyndaǵy «Qoǵamdyq kelisim» KMM dırektory Nur-Ahmet Dosmuhamet.
Ashyq esik kúnine oraı Astana qalalyq ákimdikterinde, «Nur Otan» partııasy Astana qalalyq fılıalynda odan bólek halyqqa qolaıly bolý maqsatynda «Artem» saýda úıiniń foıesinde (Sh.Ýálıhanov kósh.,47, 2 qabat) saǵat 15:00-17:00 aralyǵynda «Quqyq» qoǵamdyq qorynyń zańgerleri kásibı medıatorlar aqysyz qyzmet kórsetip, halyqqa medıatsııa qyzmeti boıynsha zańǵa sáıkes keńes berip, aqparattandyrady.
Aıta keteıik, búginde Qazaqstanda qoǵamdyq (kásibı emes) medıatorlardyń sany 3169. Al 2017 jyly respýblıka boıynsha medıatorlardyń kómegimen sheshimin tapqan daýlardyń sany 8355, sotta sheshilgeni - 7724. Ústimizdegi jyldyń 5 aıynda 9213 ótinish kelip túsip, onyń 3046 medıatsııalyq keńespen sheshimin tapqan.
