Astanada majar aqyny Shandor Petófı atyndaǵy kóshe ashyldy
Astana kósheleriniń birine majar aqyny Shandor Petófıdiń esimi berildi, dep habarlaıdy Kazinform.
«Qymbatty dostar! Ózderińiz biletindeı, búgin Majarstan Respýblıkasynyń premer-mınıstri Vıktor Orban myrza Qazaqstanǵa resmı saparmen keldi. Osy is-shara aıasynda majar eliniń qaharman patrıoty ári máshhúr aqynynyń qurmetine kóshe ashqaly jatyrmyz. Bıyl uly aqynnyń 200 jyldyǵy toılandy. Qazaqtyń uly ustazy Ahmet Baıtursynuly aıtqandaı, ómirdegi eń úlken baqyt – ultqa qyzmet etý. Sh. Petófı de óz eliniń ıgiligi úshin janyn pıda etken, janyn qıǵan azamat. Sondyqtan barlyǵymyz úshin bul ortaq jaqsylyq dep oılaımyn», - dedi kósheniń ashylý saltanatynda sóz sóılegen QR Syrtqy ister mınıstri Murat Nurtileý.
M. Nurtileý osy mańyzdy ári baıandy bastama Qazaqstan men Majarstan arasyndaǵy dástúrli dostyq pen ózara qoldaý rýhynda damyp kele jatqan mádenı gýmanıtarlyq yntymaqtastyqty tereńdete túsip, jańa belesterge shyǵarýǵa qosymsha serpin beretinine tilektestik bildirdi.
«Búgin qazaq eliniń Majarstan eline degen tereń qurmetiniń belgisin kórip otyrmyz jáne ataqty majar aqynynyń esimi kóshege berildi. Shandor Petófı – bostandyqsúıgishtigimen belgili danyshpan adam bolatyn, bul erkindik sezimi sizderge de tán. Majarstannyń tili álemde keń taralǵan tilge jatpaıdy, 14-15 mıllıon adam sóıleıtin, óte qıyn til. Árıne bizdiń til men ádebıetti túsingisi kelgen adamǵa úlken eńbek, úlken izdenis jasaýǵa týra keledi. Biraq bizdi túsingisi keletin, bizdiń ádebıetti, Shandor Petófıdi túsingisi keletinder úshin mende jaqsy jańalyq bar. Shandor Petófıdiń 196 óleńnen turatyn jınaǵy qazaq tilinde jaryq kórdi», - dedi Majarstannyń Syrtqy ister jáne saýda mınıstri Pıter Sıııarto.
Shandor Petófı – Majarstannyń aqyny, Majarstandaǵy 1848-1849 jyldardaǵy revolıýtsııa jetekshileriniń biri. Onyń «Ultqa», «Dýnaıda» jáne «Tutqyndaǵy arystan» óleńderi majar halqy patrıotızminiń erekshe sımvolyna aınaldy.
Aıta keteıik, Memleket basshysy Qasym-Jomart Toqaev Majarstan Premer-Mınıstri Vıktor Orbandy І dárejeli «Dostyq» ordenimen marapattady.
