Astanada máıithana qyzmetkerleri marqumdardan aqsha jasap kelgen
ASTANA. 27 qarasha. QazAqparat - Astana qalasynyń qarjy polıtsııasy quramyna qalalyq máıithananyń qyzmetkerleri engen qylmystyq topty ustady.
Anyqtalǵandaı, máıithana qyzmetkerleri múrdeni balzamdaý úshin marqumdardyń týystarynan resmı bekitilgen baǵa - 9 myń teńgeniń ornyna 200 dollar alyp otyrǵan. Onymen qosa, tergeý barysynda ólgendigi týraly kýálikti dıagnozdy ózgertip, jańasyna aýystyrý faktileri de anyqtaldy. Jalǵan anyqtamanyń quny da turaqty bekitilip qoıǵan - 30 myń teńge.
Qazirgi ýaqytta máıithana qyzmetkerleri atalǵan qylmystaryn moıyndap, túsinik berýde. Olardyń bir bóliginen eshqaıda ketpeý týraly qolhat alyndy. Al mekemeniń dırektory qamaýǵa alyndy.
«Úsiphanovqa laýazymdy ókilettigin asyra paıdalandy, para alýdyń eki faktisin, qyzmettik jalǵandyqtyń 12 faktisin jasady degen aıyptar taǵylyp otyr. Sot sanktsııasymen ol qamaýǵa alyndy. Sot medıtsınalyq saraptama ortalyǵynyń jalpy saraptamalyq bóliminiń meńgerýshisi aldyn ala sóz baılasý arqyly toppen birge 30 myń teńge kóleminde para aldy dep aıyptalýda», - dep málim etti Astana qalalyq qarjy polıtsııasy departamenti bastyǵynyń orynbasary Erlan Rahymbekov.
Aqparat kózi: KTK telearnasy.
