Astanada «Maıdan ánderi» monospektakliniń premerasy ótedi

ASTANA. QazAqparat - Uly Jeńistiń 70 jyldyǵy mereıtoıy aıasynda, Astana qalasy Tilderdi damytý basqarmasynyń qoldaýymen QR halyq artısi Tilektes Meıramov «Maıdan ánderi» atty monospektakldiń premerasyn usynady. Atalǵan shara 29 sáýir kúni Q. Qýanyshbaev atyndaǵy Memlekettik akademııalyq qazaq mýzykalyq drama teatrynda ótedi. Shyǵarma avtory - R. Seısenbaev, dep habarlady atalǵan basqarmanyń baspasóz qyzmetinen.

Maıdan ánderi... Reıhstag... Berlın... 11 maı... Glınkashtrasse kóshesi... Grıgorıı Avılov... Jeńis... Bul - alysta qalǵan ardaqty kúnder belgisi. Ol bas keıipker Sadyr Baıbarysovtyń surapyl soǵysta ótkergen kúnderi. Sadyr - soldat. Soǵystan aman kelgen soldat. Soǵystan oralǵan bette saqtyq mekemesine qyzmetke turǵan. Bir mekemeniń pildeı revızory bolyp, otyz bir jyl qyzmet atqaryp keledi. Sadyr qashanda án aıtyp júredi... Aıtsa, maıdanda salǵan ánin aıtady, kókeıindegi saǵynyshyn osy ándermen basady. Túsinde ylǵı maıdan, urys, Dneprde ótken sońǵy túnderin, jaraly mergenniń orys qyzyn arqalap kele jatqanda ýkraın partızandaryna tap bolǵanyn kóredi. Soǵys aıaqtalsa da, Sadyrdyń kóz aldynan sol bir surapyl kezder keter emes...

Qazaqstannyń halyq artısi, akter - Tilektes Meıramov sahna men kınodaǵy óner tájirıbesiniń taǵy bir jańa qyryn «Maıdan ánderi» atty monospektaklinde ashady. Soldat Sadyrdyń beınesin - Meıramovtyń somdaýynda kóre alasyz. Monospektakl - T.Meıramovtyń júregine, ón boıyna jaqyn janrdyń biri. Monospektakl - búgingi qazaq teatr ónerine suranyp turǵan janrdyń biri. Kásibı akterdiń álemin tanyǵyńyz kelse, akterlik ónerdiń qyr-syryn túsingińiz kelse - «Maıdan ánderin» kórýge asyǵyńyzdar!