Astanada maýsym basynan beri 27 myńnan astam JRVI jaǵdaıy tirkeldi

ASTANA. KAZINFORM – 2025 jylǵy 2 qazanda bastalǵan epıdemıologııalyq maýsymnan beri elordada jedel respıratorlyq vırýstyq ınfektsııanyń (JRVI) 27 469 jaǵdaıy tirkeldi, dep habarlaıdy qalalyq sanıtarııalyq-epıdemıologııalyq baqylaý departamenti.

Aýrýshańdyq kórsetkishi 100 myń turǵynǵa shaqqanda 1 796,8-di qurap otyr, bul ótken jylǵy sáıkes kezeńmen salystyrǵanda 5 paıyzǵa tómen. Aýyrǵandardyń negizgi bóligi – 14 jasqa deıingi balalar (61 % nemese 16 624 jaǵdaı), onyń ishinde 920-sy – bir jasqa deıingi sábıler.

Maýsym basynan beri «JRVI/tumaý» dıagnozymen 982 adam aýrýhanaǵa jatqyzylǵan, olardyń ishinde 76 júkti áıel (8 %) jáne 356 bir jasqa deıingi bala (36 %) bar.

Elordada 2025 jylǵy 23 qyrkúıekten bastap alǵashqy medıtsınalyq-sanıtarııalyq kómek uıymdarynda jergilikti bıýdjet esebinen maýsymdyq tumaýǵa qarsy vaktsınatsııa júrgizilip keledi. Bul maqsatta 145 000 doza «Grıppol+» vaktsınasy satyp alynǵan.

- 30 qazanǵa deıin 134 977 adam egildi (qalanyń 8,83 % turǵyny), olardyń 134 077-si – jergilikti bıýdjet esebinen. Táýekel tobyna jatatyn 144 500 adamnyń 72 705-i ekpe alǵan, bul 98 %-dyq qamtýdy quraıdy. Sonymen qatar jumys berýshiler esebinen qosymsha 9 000 eresek adamǵa vaktsına egildi, - dep jazdy vedomstvodan.

Dárigerler mynadaı usynymdar beredi:

• aýrý belgileri baıqalǵanda birden emhanadaǵy súzgi kabınetterine júginý;
• aýrýshańdyq deńgeıi ósken kezde adam kóp jınalatyn oryndarǵa barmaý;
• JRVI belgileri paıda bolǵanda medıtsınalyq maska taǵý;
• sýyq tııý belgileri bar balalardy balabaqsha men mektepke jibermeý;
• jeke gıgıenany saqtaý – qoldy jıi jýý, úı-jaılardy jeldetý jáne jıi paıdalanylatyn zattardy dezınfektsııalaý.

Departament epıdemıologııalyq jaǵdaıdy turaqty baqylaýda ustap otyr jáne astanalyqtardy óz densaýlyǵyna, sondaı-aq aınalasyndaǵylardyń saýlyǵyna jaýapkershilikpen qaraýǵa shaqyrady.

Aıta keteıik, SQO-da aı bastalǵaly bes myńnan astam adam JRVI juqtyrdy.