Astanada matematıka jáne mehanıka boıynsha halyqaralyq ǵylymı jobalar konkýrsy bastaldy
ASTANA. KAZINFORM - 15-17 sáýir aralyǵynda Astana qalasyndaǵy Talǵat Bıgeldınov atyndaǵy №1 mektep-lıtseıi bazasynda Ó. Joldasbekov atyndaǵy 11(12) synyp oqýshylaryna arnalǵan matematıka jáne mehanıka boıynsha zertteý jobalarynyń halyqaralyq konkýrsy ótedi.
QR Oqý-aǵartý mınıstrligi baspasóz qyzmetini habarlaýynsha, halyqaralyq ǵylymı jarysqa Qazaqstan, Taıland jáne Túrkııa elderinen 99 jobamen 135 oqýshy qatysady.
Konkýrstyń negizgi maqsaty - oqýshylardyń ǵylymı oılaý qabiletin damytý, matematıka jáne mehanıka salalarynda daryndy oqýshylardy anyqtaý, zertteý daǵdylaryn qalyptastyrý jáne jas ǵalymdarǵa qoldaý kórsetý.
Ǵylymı konkýrs matematıka, qoldanbaly matematıka, mehanıka jáne ekonomıkadaǵy matematıkalyq ádister boıynsha tórt baǵytta ótkiziledi.
Ereje boıynsha konkýrsqa respýblıkalyq ǵylymı jobalar konkýrsynyń oblystyq kezeńderiniń jeńimpazdary, qorytyndy kezeńge ótpegen І, ІІ, ІІІ dárejeli dıplom ıegerleri jáne sheteldik mektepterdiń ulttyq ǵylymı jobalar jarystarynyń jeńimpazdary qatysa alady.
Osyǵan deıin qazaqstandyq oqýshylardyń halyqaralyq matematıkalyq olımpıadadan úsh medal jeńip alǵany týraly jazdyq.
