Astanada matematıka páni ustazdarynyń I sezi ótedi
ASTANA. 5 mamyr. QazAqparat /Aıdar Ospanalıev/ - Astanada 11-12 mamyrda Bilim jáne ǵylym mınıstrliginiń uıymdastyrýymen «Qazaqstan mektepterinde matematıkalyq bilim berý isin damytý:
qazirgi jaı-kúıi men damý bolashaǵy» atty taqyrypta matematıka páni ustazdarynyń I sezi ótedi. Bul týraly búgin jýrnalıstermen bolǵan baspasóz máslıhatynda Bilim jáne ǵylym mınıstrliginiń Mektepke deıingi jáne orta bilim berý departamentiniń dırektory Bahrıden Kárimjan málim etti.
Onyń sózine qaraǵanda, atalmysh sezd Bilim jáne ǵylym mınıstri Baqytjan Jumaǵulovtyń bastamasymen elimizde alǵash ret uıymdastyrylǵaly otyr. «Bul óte mańyzdy shara. Mektepte oqytylatyn pánderdiń ishinde matematıka pániniń orny bólek. Búgingi tańda elimizdegi 7 myń 516 mektepte 20 myń 445 matematıka pániniń ustazdary bar. Olardyń 98 paıyzy joǵary bilimdi. ıAǵnı ustazdardyń bilimi de biliktiligi de jetkilikti. Degenmen qazirgi halyqaralyq reıtıng kórsetkishteri boıynsha qazaqstandyq oqýshylardyń nátıjeleri kóńil toltyrarlyqtaı emes. Qazaqstandyq oqýshylar matematıka páninen kóptegen olımpıadalar men baıqaýlardyń jeńimpazdary atanyp júr. Al halyqaralyq reıtıng eldegi mektepterdegi matematıka pániniń jalpy oqytylý ádisine baǵa berip otyr», - deıdi departament dırektory.
Onyń aıtýynsha, sezd barysynda matematıka pánin oqytýmen baılanysty qazirgi tańda týyndap otyrǵan aýqymdy máseleler talqylanady. Sezge elimizdiń barlyq aımaqtarynan 2 myńǵa jýyq adam qatysady. Olardyń 500-i sezge delegat retinde keledi. Sondaı-aq jıynǵa Reseı men Bolgarııa elderiniń ǵalymdary qatysady
dep kútilýde. «Sezd óziniń alǵashqy jumysyn matematıka pánine arnaǵaly otyr. Al kelesi jyly osy sezde fızıka men ınformatıka pánderine qatysty problemalar talqylanady. Osyndaı jolmen biz bilim berý salasynda qalyptasqan barlyq máselelerdiń sheshý joldaryn qarastyrmaqpyz»,-deıdi B.Kárimjan.
