Astanada Massmedıa jáne kommýnıkatsııa ınstıtýtyn ashý kerek - A. Smaıyl
ASTANA. 6 naýryz. QazAqparat - Elordada Massmedıa jáne kommýnıkatsııa ınstıtýtyn ashý kerek. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Aldan Smaıyl osylaı málim etti.
Saýal barysynda depýtat elimizde BAQ jáne kıno salalaryndaǵy kadr daıarlaý máselesine toqtala kele, kásibı jýrnalıster daıarlaý máselesine alańdaýshylyq bildirdi.
«Halyqaralyq tájirıbege jetik telejýrnalısterdiń joqtyǵynan shetelder teleradıo korporatsııalarymen shyǵarmashylyq baılanys ornatylmaı otyr. Biz olarmen saıası, mádenı-rýhanı taqyryptarda súbeli jobalardy birge jasaı alar edik. Atalǵan olqylyqtardyń orny tolmaı, «Qazaqstan - 2020» memlekettik baǵdarlamasynyń jobasynda qarastyrylǵan maqsattardy júzege asyrý múmkin emes. Qyrýar qarjy bólinip engizilip jatqan «Sandyq televıdenıeniń» múmkindikterin de tolyq paıdalana almaımyz», - deıdi depýtat. Onyń aıtýynsha, memlekettik aqparatttyq saıasat salasynda kemshilikter jeterlik. «Al basty olqylyq - elimizdiń joǵarǵy oqý oryndaryndaǵy jýrnalıstıka fakýltetteri oqý baǵdarlamalarynyń eskirýi. Olardyń ǵylymı-tehnıkalyq bazasy jutań. Bul júıe zamanǵa óte baıaý beıimdelýde. Sondyqtan jekelegen oqý oryndaryndaǵy fakýltetterdi ońtaılandyrý arqyly Astanada barlyq jaǵynan qamtamasyz etilgen, shetelderdiń atalǵan saladaǵy jetekshi oqý oryndarymen tyǵyz qarym-qatynasta jumys isteıtin Massmedıa jáne kommýnıkatsııa ınstıtýtyn ashý kerek. Aqparattyń ult pen memlekettiń ómirindegi qazirgi jáne erteńgi aıryqsha yqpalyn eskere otyryp osylaı jasaýǵa tıispiz. Bul ınstıtýtty Vashıngtondaǵy ǵalamǵa máshhúr «Televıdenıe jáne radıohabarlaryn taratý Akademııasy» nemese Nıý-Iorktegi tele jáne radıo óneri fakýlteti úlgisinde uıymdastyra alar edik», - deıdi depýtat A. Smaıyl.
