Astanada masamen kúres jumystary qalaı júrgiziledi
NUR-SULTAN. QazAqparat – Jaz maýsymy bastalǵaly masaǵa qarsy dezınsektsııalyq jumystar belsendi júrgizilgenimen, elorda turǵyndarynyń shaǵymy azaıar emes. Osy oraıda Esil jáne Saryarqa aýdandarynyń ákimdikteri masamen kúres jumystary jóninde baıandady, dep habarlaıdy QazAqparat.
Esil aýdanynyń derekterine sáıkes, kún saıyn masaǵa qarsy sharalar júrgiziletin aýmaqtardyń kestesi jasalady. Jalpy ýlaý sharalary aýdanda alty kezeń boıynsha júrgiziledi.
«Bastapqy kezeń bıyl 28 sáýir men 15 mamyr aralyǵynda ótti. Ekinshi kezeń 28 mamyrdan 19 maýsymǵa deıin, al úshinshisi – 20 maýsymnan 16 shildege deıin júrgizilgen. Tórtinshi kezeń 17 shildede bastaldy jáne 16 tamyzǵa deıin jalǵasady. Ýlaý jumystary «Esil aýdanynyń» barlyq aýmaǵynda túngi saǵat 23:00-5:00 aralyǵynda ótedi. Onda termogeneratorlar men rotorlyq búrikkishter qoldanylady», - delingen ákimdik habarlamasynda.
Osylaısha, kún saıyn 2 entomolog, motorlyq-rotorlyq búrikkishi bar 22-28 dezınsektor, 4 arnaıy tehnıka, 2 gazel, 1 jolaýshylar avtobýsy jáne termogeneratorlyq qurylǵylar jumys isteıdi. Tehnıkalyq sıpattamaǵa sáıkes, aı saıyn shamamen 900 gektar, taıaz sý qoımalary boıynsha – 210 ga aýmaqta jumys júrgizilýi tıis.
«Bir kezeń shamamen 16-20 kúnge sozylady. Ýlaý sharalaryn júrgizýde aýa raıy jaǵdaıy da eskeriledi. Jańbyr, jel bolǵanda bul jumys toqtatylady, sebebi dezınsektsııalyq jumystyń tıimdigine keri yqpal etedi. Jańbyr preparatty shaıyp ketýi múmkin», - deıdi ákimdik.
Qolaısyz aýa raıy jaǵdaıyna baılanysty Esil aýdanynda 28-29 shilde kúnderi dezınsektsııa jumystary júrgizilmegen.
Óz kezeginde Saryarqa aýdanynyń ákimdigi masaǵa qarsy sharalardy júrgizýde aýdandy 12 sektorǵa bólgenin aıtty. Olardyń arasynda Kóktal 1, Kóktal 2, Agroqalashyq pen Qarttar úıiniń aýmaǵy da bar.
«2019 jyldyń 17 shildesinen beri masadan qorǵaý jumystarynyń tórtinshi kezeńi bastaldy. Esil ózeniniń boıymen «Ramstor» saýda ortalyǵynan batysqa qaraı, Respýblıka dańǵyly boıynsha «Ramstor» saýda ortalyǵynan Bógenbaı batyr dańǵylyna qaraı, Bógenbaı batyr dańǵyly boıynsha Respýblıka dańǵylynan temir jolǵa deıingi aýmaq qamtyldy. Jeńis, Bógenbaı, Respýblıka dańǵyldarynda, Esil ózeniniń jaǵalaýynda ýlaý jumystary júrgizildi», - dep habarlady Saryarqa aýdanynyń ákimdigi.
