Astanada masalarmen kúres bastaldy

ASTANA. QazAqparat - Qalada kún jylynǵanda shybyn-shirkeımen kúres bastalady. Sáýir aıynyń ortasynda úsh aýdanda da masalardy joıý jumystary qolǵa alyndy. Osy kúnge deıin qalada 26 myń gektardan astam jer men saıaz sýdyń 3,5 myń gektardan artyq aýmaǵy óńdeldi. Qalada zalalsyzdandyrý jumystaryna 187 jumyskerden turatyn 10 brıgada tartylǵan, dep habarlady astana.gov.kz.

Qazirgi kezde Astana qalasynyń «Almaty» aýdany boıynsha 6 myń ga jýyq aýmaq, aýdany 603,5 ga saıaz sý óńdeldi; Saryarqa aýdanynda 4 myń ga jýyq aýmaq pen aýdany 1518 ga batpaq jer óńdeldi; «Esil» aýdanynda óńdelgen aýmaq 1050,45 ga qurady, al ózen aýdany - 1491 ga. Masalarmen kúresý úshin quramyna tsıpermetrın jáne hlorperıfos kiretin preparattar paıdalanylady. 1 ga jerge zalalsyzdandyratyn zattyń 0,350 l mólsheri jumsalady.

Ústimizdegi jyldyń sáýir aıynyń sońynda sý qoımalaryn óńdeýdiń birinshi kezeńi aıaqtaldy. Tıisti jumystar Alash jáne Qaraǵandy tasjoldarynyń boıynda, Mıchýrıno, Internatsıonalnyı, Promyshlennyı kentterindegi ózenderde, Telman, Shubar, Prıgorodnyı, Zarechnyı, Úrker, Shyǵys Ilınka turǵyn alaptarynda júrgizildi. Sarybulaqtyń boıy jáne Esil ózeniniń jaǵasy, Taldykól mańy da tys qalǵan joq. Qazirgi kezde masalardyń ushýyn boldyrmaý úshin batpaq jerler men taıaz ózenderdi tekserý jumystary qolǵa alyndy.

Astananyń úsh aýdanynda ashyq aýmaqtar masalardan qorǵaıtyn barermen óńdeldi. Aıta keteıik, ashyq aýmaqtarda deratızatsııa - kemirgishterdi joıý jumystary da júrgizilip jatyr. Búginde qala aýmaǵynda «Nura-Esil» kanaly, Taldykól sý jınaǵyshy jáne onyń mańyndaǵy sý qoımalary, Astana men qalanyń aınalasyndaǵy ózender óńdeldi.