Astanada masalarǵa qarsy kúrestiń úshinshi kezeńi bastaldy
ASTANA. KAZINFORM – Elordada masalarǵa qarsy aýqymdy dezınsektsııalyq jumystyń úshinshi kezeńi bastaldy.
Qala ákimdiginiń málimetinshe, 16 maýsymnan bastap qalanyń ortalyq bóliginde jappaı óńdeý júrgizilýde. Keıin masalardyń shetki aýdandarǵa yǵysýyna jáne qaıta taralýyna jol bermeý sharalary qolǵa alynady.
- Bıylǵy maýsym bastalǵaly beri Astanada 26 myń gektardan astam aýmaq óńdelgen. Dezınsektsııalyq jumystar kún saıyn túngi saǵat 21:00-den tańǵy 04:00-ge deıin júrgiziledi. Ár kezeńniń uzaqtyǵy – 20 kún, - delingen Astana ákimdiginiń dereginde.
Mamandardyń aıtýynsha, bıylǵy naýqan alty kezeńnen turady. Masalardy tolyq joıý kózdelmeıdi, alaıda júrgizilip jatqan sharalar olardyń sanyn 90 paıyzǵa deıin azaıtýǵa múmkindik beredi.
Óńdeý jumystaryna mehanıkalyq rotorly búrikkishter, arnaıy tehnıkalar, kvadrokopterler jáne iri sý aıdyndarynda qoldanylatyn arnaıy qaıyqtar paıdalanylady. Naýqanǵa arnaıy daıyndyqtan ótken 150-den astam maman jumyldyrylǵan.
Sonymen qatar turǵyn úılerge qyzmet kórsetetin uıymdarǵa, bilim berý, densaýlyq saqtaý, mádenıet jáne sport mekemelerine, qurylys nysandary men saýda oryndaryna jertólelerdi tazalap, qosymsha óńdeý jumystaryn júrgizý tapsyryldy.
Mamandar óńdeý júrgizilip jatqan ýaqytta turǵyndarǵa qaýipsizdik sharalaryn saqtap, terezelerdi jaýyp qoıýǵa jáne óńdeý aýmaqtaryna barmaýǵa keńes beredi.
Aıta keteıik, buǵan deıin Pavlodar turǵyndary sary masanyń shabýylyna ushyrap jatqany habarlandy.
