Astanada masaǵa qarsy dezınsektsııa bastaldy
NUR-SULTAN. QazAqparat - Nur-Sultan qalasynda shybyn-shirkeı, masa jáne basqa da jándikterge qarsy keń aýqymdy dezınsektsııalyq jumystar júrgizilýde, dep habarlaıdy QazAqparat elorda ákimdigine silteme jasap.
Birinshi kezeńde bul jumystar jertóleler men sý qoımalarynda atqarylýda. Jumystar tańǵy jáne keshki ýaqytta júrgiziledi.
«Bıyl qar kóp boldy. Sondyqtan sý qoımalarynda sý mólsheri de mol. Jumysty sol aýmaqtarda júrgizetin bolamyz, maqsatymyz – masalardyń sanyn dernásil kezeńinde azaıtý. Bıyl masalardan aýmaqty óńdeý jospary 20%, sý qoımalaryn óńdeý 25% artty», - dedi «Astanalyq dezınfektsııa» JShS dırektorynyń orynbasary Bekbolat Talǵarbekov.
Birinshi kezeń aıaqtalǵannan keıin dezınsektsııalyq jumystar qalanyń ishki aýmaqtarynda, saıabaqtarda, tynymbaqtarda, kóshelerde júrgiziledi. Sondaı-aq, turǵyn úılerdiń jertóleleri, mektepter, balabaqshalar, densaýlyq saqtaý, mádenıet jáne sport nysandary, bazarlar, saýda úıleri jáne taǵy basqa mekemeler dezınsektsııalanady.
