Astanada masaǵa qarsy dezınsektsııa bastaldy: 8600 gektar sý aıdyny óńdeldi
ASTANA. KAZINFORM – Elordada masa, shybyn-shirkeı jáne ózge de jándikterge qarsy aýqymdy dezınsektsııalyq jumystardyń birinshi kezeńi bastaldy.
Qala ákimdiginiń málimetinshe, sáýir aıynyń basynan beri masa dernásilderi anyqtalǵan 8600 gektar sý aıdyny óńdelgen.
– Dezınsektsııa eki aýysymda júrgizilýde. Sý aıdyndaryn óńdeý aıaqtalǵannan keıin 27–29 sáýir aralyǵynda qalanyń ortalyq bóligin jappaı óńdeý bastalady. Jumystar ortalyqtan shet aımaqtarǵa qaraı yǵystyrý ádisimen júrgiziledi, – delingen habarlamada.
Mamandardyń aıtýynsha, jándikterdi tolyq joıý kózdelmeıdi, alaıda júrgiziletin sharalar olardyń sanyn 90%-ǵa deıin azaıtýǵa múmkindik beredi.
Dezınsektsııa túngi ýaqytta – saǵat 21:00-den 04:00-ge deıin ótedi. Ár kezeń 20 kúnge sozylady, jalpy alty kezeń josparlanǵan.
Jumystarǵa 150-den astam arnaıy daıyndyqtan ótken maman tartylǵan. Óńdeý barysynda mehanıkalyq búrikkishter, arnaıy tehnıkalar, kvadrokopterler jáne iri sý aıdyndarynda jabdyqtalǵan qaıyqtar qoldanylady.
Sondaı-aq basqarýshy kompanııalar men túrli nysandarǵa jertólelerdi qurǵatý, aýmaqtardy abattandyrý jáne qosymsha dezınsektsııa júrgizý tapsyrylǵan.
Aıta keteıik, qaýipsizdik maqsatynda turǵyndarǵa óńdeý júrgizilip jatqan aýmaqtarǵa barmaý jáne jumystar kezinde terezelerdi jabý usynylady.
Buǵan deıin Almatyda kenelerge qarsy dezınsektsııalyq óńdeý jumystary bastalǵany habarlandy.
