Astanada masa shaqqan áıelge qandaı preparattar egildi - dárigerler jaýaby
Eske sala ketsek, 28 jastaǵy Maqpal Espenbetova masa shaqqannan keıin kómekke júginip, Astananyń №1 aýrýhanasynda ajal qushqan bolatyn. QR Densaýlyq saqtaý mınıstri Eljan Birtanov qaıǵyly oqıǵa boıynsha tergeý jumystary bastalǵanyn habarlady.
«Qaıtys bolǵan patsıenttiń týystaryna kóńil aıtamyz jáne qaıǵyly oqıǵa boıynsha tergeý jumystaryn júrgizip jatyrmyz. Ol 31 tamyz kúni 15:40-ta aýrýhanamyzǵa keldi jáne jándik shaǵyp alǵanyn aıtty. Qandaı jándik ekenin aıta almady. Toksıkolog dárigerler oǵan aýrýhanaǵa jatýdy usyndy, alaıda patsıent balalaryn 1 qyrkúıekte mektepke aparýy kerek ekenin aıtyp, aýrýhanaǵa jatýdan bas tartty. Sóılesý barysynda dáriger qaıtys bolǵan áıeldiń allergııasy bar ekenin, buǵan deıin allergııaǵa qarsy preparattardy óz betimen qabyldap júrgenin bilgen. Dáriger oǵan «Prednızolon» men «Sýprastın» dárilerin jazyp bergen jáne aýyrýdy basý úshin meıirbıke «Ketorol» ekken», - dedi Marat Ábdýov Astana ákimdiginde ótken brıfıngte.
Onyń aıtýynsha, atalǵan preparattardy qaıtys bolǵan áıel buryn da qabyldaǵan jáne synama júrgizilmegen.
«Negizi dári synamalary antıbıotıkterge júrgiziledi, bul preparattar shokqa qarsy dáriler qataryna jatady jáne kerisinshe shok jaǵdaıynda beriledi. Qaıtys bolǵan áıel buryn da atalǵan preparattardy qabyldaǵan. Naqtylap aıtqanda, bulshyqetke bir ampýla Sýprastın, bir ampýla Ketorol egilgen. Prednızolon 120 mıllıgramm bolǵan, biraq onyń 4 mılılıtri - 30 mılıgrammyn ǵana», - dedi M. Ábdýov.
Spıkerdiń sózinshe, oqıǵa bolysymen tergeý brıgadasy men krımınalıster shaqyrylǵan jáne barlyq ampýlalar tekserýge berilgen. Oqıǵaǵa qatysy bar barlyq qyzmetkerlerden jaýap alynǵan.
«Oqıǵa boıynsha arnaıy komıssııa quryldy. Komıssııaǵa preparattar týraly barlyq qujat jiberildi jáne bul toptamadaǵy preparattar aýrýhana aınalymynan alynyp tastaldy. Preparattar Úndistanda jasalǵan jáne SQ-Farmatsııa biryńǵaı dıstrıbıýtory arqyly jetkizilgen», - dedi Marat Ábdýov.
Sonymen birge, Marat Ábdýov dárigerler patsıenttiń jazbasha kelisimin alyp úlgermegenin jetkizdi.
“Patsıentke ázirge naqtylanbaǵan shok dıagnozy qoıylyp otyr, ólim sebebi baıaý áser etetin allergııalyq reaktsııa bolýy múmkin. ıAǵnı, aǵzada allergen jınalyp qalady da, birtindep shok paıda bolady. Mundaı jaǵdaıdyń bolýy ábden múmkin. Ádette patsıentter statsıonarǵa rásimdelýde barlyq is-sharalarǵa kelisý úshin qol qoıady. Dáriger qaıtys bolǵan áıeldiń jaqynda ǵana sýprastın qabyldaǵanyn, buryn da qabyldap júrgenin anyqtaǵan jáne jazbasha kelisim alyp úlgermegen. Meıirbıke ózine berilgen tapsyrmany oryndap, bulshyqetke eki dári ekken. Prednızolonnyń 4 mılılıtrin egý barysynda patsıenttiń jaǵdaıy nasharlaǵan”, - dep túsindirdi bas dáriger.