Astanada masa men shirkeıge qarsy óńdeý jumystary sáýirdiń ekinshi jartysynda bastalady
ASTANA. KAZINFORM – Astanada masa men shirkeıge qarsy dezınsektsııalyq jumystar sáýir aıynyń ekinshi jartysynan bastalady. Bul týraly qala ákimdiginiń resmı saıty habarlady.
Qalalyq Qorshaǵan ortany qorǵaý jáne tabıǵatty paıdalaný basqarmasynyń málimetinshe, bıyl dezınsektsııalyq jumys alty kezeńge bólinip júrgiziledi. Qazirgi ýaqytta qala aýmaǵynda entomologııalyq monıtorıng bastalyp ketken. Onyń aıasynda sý qoımalary jándikterdiń dernásilderiniń bolýyna tekserilýde.
Veterınarııa jáne fıtosanıtarııa bóliminiń basshysy Azat Turapbaev daıyndyq jumystary aldyn ala bastalǵanyn atap ótti.
«Qazirgi ýaqytta Astananyń barlyq aýmaǵynda entomologııalyq zertteýler júrgizilýde. Biz sý qoımalaryn masa dernásilderiniń bolýyna qatysty tekseremiz. Jalpy, óńdeý jumysy sáýirdiń ekinshi jartysynan bastalady. Kúnine shamamen 110–120 dezınsektor jumyldyrylatyn bolady», – dedi ol.
Alty kezeńniń árqaısysy birneshe satydan turady: aldymen sý qoımalary óńdeledi, keıin qalanyń ashyq aýmaqtary qamtylady. Jumys ortalyqtan bastalyp, qala shetine qaraı júrgiziledi.
Astanalyq dezınfektsııa JShS-niń atqarýshy dırektory Altynbek Mertasov negizgi daıyndyq tolyq aıaqtalǵanyn jetkizdi.
«2 sáýirden bastap biz shaǵyn sý qoımalary men batpaqty jerlerge entomologııalyq monıtorıng júrgizýdi bastadyq. Ǵylymı top tekserýge shyqty. Qazir daıyndyq sharalary aıaqtalýda: tehnıka, jabdyqtar jáne personal tolyq daıyn. Sý qoımalarynan ekinshi–úshinshi kezeńdegi dernásilder tabylǵannan keıin óńdeýge kirisemiz. Keıin ashyq aýmaqtarǵa – saıabaqtarǵa, gúlzarlarǵa, turǵyn úı alaptary men joldarǵa ótemiz», – dedi ol.
Іs-shara barysynda qoldanylatyn tehnıkalar qatarynda motorly arqalyq búrikkishter, ystyq tuman generatorlary, dezınsektsııalyq mashınalar, qaıyqpen óńdeýge arnalǵan jabdyqtar jáne agrodrondar bar.
Mamandardyń aıtýynsha, óńdeý kezinde adamdar men janýarlarǵa qaýipsiz, jumsaq preparattar paıdalanylady. Al sý qoımalary úshin ekojúıege zııan keltirmeıtin bıologııalyq quraldar qoldanylady.
Aıta keteıik, Almatyda kenelerge qarsy dezınsektsııalyq óńdeý jumystary bastaldy.
