Astanada masamen kúrestiń tórtinshi kezeńi bastaldy
ASTANA. KAZINFORM — Astanada masa, shirkeı jáne ózge de jándikterge qarsy aýqymdy dezınsektsııalyq jumys júrip jatyr, dep habarlaıdy qala ákimdigi.
Qazirgi ýaqytta dezınsektsııalyq sharalardyń tórtinshi kezeńi jalǵasyp jatyr. Onyń aıasynda 10 myń gektar aýmaq óńdeldi.
Óńdeý jumysy qalanyń ortalyǵynan bastalyp, shet aımaqtarǵa qaraı yǵystyrý ádisimen júrgiziledi. Sonymen qatar qorǵanys beldeýi qalyptastyrylady.
Bul jumys kún saıyn saǵat 21:00-den 05:00-ge deıin júrgiziledi. Ár kezeń aı saıyn 20 kúnge sozylady. Jalpy alty kezeń ótkizý josparlanǵan.
— Masalar ekojúıeniń bir bóligi bolǵandyqtan, olardy tolyqtaı joıý kózdelmeıdi. Alaıda júrgizilip jatqan sharalar olardyń sanyn 90%-ǵa deıin azaıtýǵa múmkindik beredi, — delingen habarlamada.
Dezınsektsııalyq jumys júrgizý úshin mehanıkalyq rotorly búrikkishter, arnaıy dezınsektsııalyq kólikter, qamys ósken jetýi qıyn tustardy óńdeýge arnalǵan drondar, sondaı-aq iri sý aıdyndarynda arnaıy jabdyqtalǵan qaıyq paıdalanylady.
Aýqymdy jumysqa arnaıy daıyndyqtan ótken jáne qaýipsizdik talaptary boıynsha nusqamadan ótken 150-den astam dezınfektor jumyldyrylǵan.
Sonymen qatar ákimdik turǵyn úı qoryna qyzmet kórsetetin basqarýshy kompanııalar, PIK, MIB, bilim, densaýlyq saqtaý, mádenıet, sport, qurylys nysandary, bazarlar, saýda úıleri jáne basqa da uıymdarǵa jertólelerdi qurǵatyp, abattandyrý júrgizip, olardy dezınsektsııalyq óńdeýden ótkizýdi usyndy.
Dezınsektsııalyq jumys kezinde turǵyndar mynadaı saqtyq sharalaryn saqtaýy qajet:
- óńdeý júrgizilip jatqan aýmaqtarǵa barmaý;
- óńdeý jumysy kezinde terezelerdi jaýyp qoıý.
Eske salaıyq, buǵan deıin Astanada masalarǵa qarsy kúrestiń úshinshi kezeńi ótkenin habarlaǵanbyz.
