Astanada «Mas júrgizýshi - qylmysker!» aktsııasy ótedi
ASTANA. QazAqparat - Elordalyq polıtseıler 5-7 naýryz kúnderi qala aýmaǵynda «Mas júrgizýshi - qylmysker!» jedel aldyn alý is-sharasyn ótkizedi. Bul týraly Astana qalasynyń ІІD ákimshilik polıtsııa basqarmasynan habarlady, dep jazady elorda ákimdiginiń resmı saıtynda.
Bul shara apattylyqty azaıtýǵa, jol-kólik oqıǵalarynyń aldyn alýǵa, sondaı-aq apattylyqqa jáne aýyr JKO saldaryna ákeletin jol qozǵalysy erejelerin buzýshylyqtardy anyqtap, olardyń aldyn alýǵa baǵyttalǵan. Vedomstvonyń atap ótýinshe, búgingi tańda Astana qalasynyń jol-patrýldik polıtsııa basqarmasynyń qyzmetkerleri 35 myńnan astam júrgizýshini ákimshilik jaýapkershilikke tartty. Sonyń ishinde 300 kólik ıesi mas kúıinde ustalǵan. Qazirgi ýaqytta olar 2 jylǵa kólik júrgizý quqyqtarynan aıyryldy. «Baǵdarshamnyń tyıym salǵan belgisinde jol qıylystaryn kesip ótkeni úshin 840 tártip buzýshy ákimshilik jaýapkershilikke tartyldy, 515 jaıaý júrginshi arnaıy joldardan ótý erejelerin buzǵan, sondaı-aq 450 júrgizýshi apatty jaǵdaı týdyrǵan», - dep atap ótti atalmysh mekeme qyzmetkerleri. Aıta keteıik, kólikti mas kúıinde basqarý - jol qozǵalysy erejelerin buzýdyń áleýmettik turǵydan asa qaýipti jaǵdaılarynyń biri bolyp tabylady. Ol úshin 2 jylǵa kólik júrgizý quqyǵynan aıyrý jazasy qarastyrylǵan.
