Astanada mas kúıinde kólik júrgizgen sýdıanyń isi Bas prokýratýraǵa joldandy

ASTANA. KAZINFORM – Sýdıanyń alkogoldik mas kúıinde kólik júrgizdi degen kúdikpen ustalǵany týraly aqparatqa baılanysty Astana qalalyq sotynyń baspasóz qyzmeti resmı málimdeme taratty.

Málimdemede atap ótilgendeı, Qazaqstan Respýblıkasynyń sýdıalary sot tóreligin júzege asyrý kezinde óz táýelsizdigin qamtamasyz etetin erekshe quqyqtyq mártebege ıe. Alaıda bul mártebe olardy quqyq buzýshylyq jasaǵany úshin jaýapkershilikten bosatpaıdy.

- Ákimshilik quqyq buzýshylyq týraly materıaldar Іshki ister mınıstrligi tarapynan Bas prokýratýraǵa joldanǵan. Óz kezeginde Bas prokýratýra qoldanystaǵy tártipke sáıkes sýdıany jaýapkershilikke tartý máselesin qaraý úshin Joǵary Sot Keńesine usynys engizedi.

Sonymen qatar, tártiptik jaýapkershilikke tartý, sondaı-aq sýdıalardy irikteý, taǵaıyndaý jáne qyzmetten bosatý máseleleri derbes memlekettik organ – Qazaqstan Respýblıkasynyń Joǵary Sot Keńesiniń quzyretine jatady, - delingen aqparatta.

Baspasóz qyzmetiniń málimetinshe, ýákiletti organdar barlyq qajetti tekserýlerdi zańnama talaptaryna qatań sáıkes júrgizip jatyr.

«Qazaqstan Respýblıkasynyń sot júıesi zańdylyq, ádildik jáne laýazymyna ne mártebesine qaramastan, barlyq azamattardyń zań aldynda teńdigi qaǵıdattaryn árdaıym ustanady. Sýdıa tarapynan zań men qyzmettik mindetterin buzý faktisi zań talaptaryna sáıkes tıisti quqyqtyq baǵa men saldarynsyz qalmaıdy», – dep jazdy Astana qalalyq sotynan.