Astanada mas kúıinde kólik júrgizgen er adam bir jylǵa sottaldy
ASTANA. KAZINFORM — Mas kúıinde kólik quralyn qaıta basqarǵan júrgizýshi ómir boıyna kólik basqarý quqyǵynan aıyrylyp, bir jylǵa bas bostandyǵynan aıyryldy, dep habarlaıdy Astana qalasy prokýratýrasynyń baspasóz qyzmeti.
Aqmola oblysynyń turǵyny buǵan deıin bir jyl merzimge kólik quraldaryn basqarý quqyǵynan aıyrylǵanyna qaramastan, qaıtadan alkogoldik masań kúıde kólik quralynyń tizginine otyrǵan.
Sotta ol buǵan deıin kóp mólsherde ulttyq sýsyn qymyz ishkenin túsindirgen.
Memlekettik aıyptaýshy sotta sottalýshynyń kinásin dáleldeıtin barlyq dáleldemeni usyndy.
— Sottalýshynyń kinásin moıyndaǵanyn jáne onyń jas balalary bar ekenin eskere otyryp, sot úkimimen oǵan 1 jyl merzimge bas bostandyǵynan aıyrý jazasy taǵaıyndalyp, kólik quraldaryn basqarý quqyǵynan ómir boıyna aıyryldy. Sot úkimi zańdy kúshine endi, — delingen habarlamada.
Astana qalasynyń prokýratýrasy kólik quralyn masań kúıde basqarmaýǵa shaqyrady, óıtkeni mundaı áreket azamattardyń ómiri men densaýlyǵyna naqty qaýip tóndirip, qatań jaýaptylyqqa ákep soǵady.
Budan buryn Jambyl oblysynda polıtsııadan qashqan mas júrgizýshi 7 jylǵa kólik júrgizý quqyǵynan aıyrylǵanyn jazǵanbyz.
