Astanada mas kúıinde kólik júrgizetin júrgizýshilerge baqylaý kúsheıdi
ASTANA. KAZINFORM — Astana qalasynyń polıtsııa qyzmetkerleri ótken demalys kúnderi alkogoldik masań kúıde kólik júrgizgen 24 júrgizýshini anyqtady, dep habarlaıdy elorda ákimdiginiń resmı saıty Polıtsııa departamentiniń baspasóz qyzmetine silteme jasap.
Osyndaı oqıǵalardyń birin Patrýldik polıtsııa polkiniń qyzmetkerleri túngi saǵat shamamen birde anyqtady. Elorda kósheleriniń birinde Haval avtokóligi toqtatyldy.
Kólik tizgininde 38 jastaǵy er adam bolǵan. Medıtsınalyq kýálandyrý nátıjesinde onyń alkogoldik masań kúıde kólik basqarǵany anyqtaldy.
— Júrgizýshige qatysty QR ÁQBtK-niń 608-baby 1-bóligi boıynsha ákimshilik hattama toltyryldy. Sot sheshimimen er adam 7 jyl merzimge kólik quraldaryn basqarý quqyǵynan aıyrylyp, 15 táýlikke ákimshilik qamaqqa alyndy, — delingen qalalyq Polıtsııa departamentiniń habarlamasynda.
Astana qalasynyń Polıtsııa departamenti kólik quralyn mas kúıinde basqarý jol qozǵalysy qaýipsizdigine, azamattardyń ómiri men densaýlyǵyna eleýli qaýip tóndiretinin jáne Qazaqstan Respýblıkasynyń zańnamasyna sáıkes qatań jaýapkershilikke ákep soǵatynyn eskertedi.
Osydan buryn Jambyl oblysynda polıtsııadan qashqan mas júrgizýshi 7 jylǵa kólik júrgizý quqyǵynan aıyrylǵany aıtyldy.
