Astanada mas kúıinde kólik aıdaǵan júrgizýshi polıtsııadan qashyp, patrýldik kólikke soqtyǵysty

ASTANA. KAZINFORM – Astanada júrgizýshi kýáliginen aıyrylǵan azamat mas kúıinde kólik basqaryp, polıtseılerden qashýǵa tyrysty. Ol birneshe ret jol qozǵalysy erejesin buzyp, aqyry patrýldik avtokólikpen soqtyǵysqan. Bul týraly Astana qalasynyń prokýratýrasy málim etti.

Polıtsııa qyzmetkerleri toqtaý talabyn qoıǵan sátte er adam baǵynbaı, oqıǵa ornynan boı tasalaýǵa tyrysqan. Qashý barysynda jol qozǵalysy erejelerin óreskel buzyp, aınaladaǵy adamdardyń ómiri men densaýlyǵyna qaýip tóndirgen.

- Qylmystyq áreket patrýldik avtokólikke soqtyǵysýmen aıaqtaldy. Buzaqy ustalyp, ýaqytsha ustaý ızolıatoryna qamaldy.

Sot úkimimen ol kináli dep tanylyp, 4 jyl merzimge bas bostandyǵynan jáne ómir boıy kólik basqarý quqyǵynan aıyryldy. Keltirilgen materıaldyq shyǵyn sottalýshy tarapynan tolyq ótelgen, - dep jazdy prokýratýradan.

Astana qalasynyń prokýratýrasy kólik júrgizý quqyǵynan aıyrylǵan adamnyń alkogoldik, esirtkilik nemese ýytqumarlyq mas kúıinde kólik basqarýy, sondaı-aq mundaı adamǵa kólik quralyn basqarýǵa múmkindik berý – QR zańnamasyna sáıkes, ómir boıy kólik júrgizý quqyǵynan aıyra otyryp, 10 jylǵa deıin bas bostandyǵynan aıyrý jazasyna ákeletinin eskertedi.

Aıta keteıik, bıyl kólik polıtseıleri 20 mıllıon jolaýshynyń qaýipsizdigin qamtamasyz etti.