Astanada mas kúıinde kólik júrgizgen 9 adam qoǵamdyq jumysqa jegildi
ASTANA. QazAqparat - Astanada jyl basynan beri mas kúıinde kólik júrgizgen 9 adam qoǵamdyq jumysqa jegildi. Bul týraly búgin Astana qalalyq prokýratýrasynda ótken brıfıngte qalalyq prokýror kómekshisi, 2-shi basqarma basshysy Rýslan Aıtymov málim etti.
Onyń aıtýyna qaraǵanda, jyl basynan beri Astana qalasynda azamattardyń kólikti mas kúıinde júrgizý nemese kólik júrgizýge quqy joq bola otyryp, kólikti basqarý úshin rýlge otyrǵan 69 fakti anyqtalyp, tirkeldi.
«Máselen, osy jyldyń 19 maýsymynda túngi saǵat 02.00 shamasynda kólik júrgizý quqyǵynan aıyrylǵanyna qaramastan, esirtki tutynyp alyp, «Nıssan» markaly kóligin júrgizip kele jatqan A. esimdi azamat ustaldy. Oǵan elordanyń Almaty aýdandyq soty 99 100 teńge kóleminde aıyppul salyp, úsh jyl boıy kólik júrgizý quqyǵynan aıyrdy. Al, 18 sáýir kúni túnde S. esimdi elorda turǵyny mas kúıinde kólik júrgizip bara jatyp, jol polıtsııasynyń kózine túsken. Bul azamat 200 saǵatqa qoǵamdyq jumysqa jegildi jáne úsh jylǵa kólik júrgizý quqyǵynan aıyryldy», - dedi R. Aıtymov.
«Jalpy jyl basynan beri ishimdik iship, kólikti basqarǵan toǵyz adam qoǵamdyq jumysqa jegilip otyr», - dedi ol.
