Astanada mas kúıde rólge otyrǵandar qatań jazaǵa tartylyp jatyr
ASTANA. KAZINFORM — Jol qozǵalysynyń qaýipsizdigi kóp jaǵdaıda árbir júrgizýshiniń jaýapkershiligine baılanysty. Osy oraıda alkogoldik nemese esirtkilik masań kúıde kólik júrgizý jaǵdaılarynyń aldyn alýǵa erekshe nazar aýdarylady, dep habarlaıdy elorda ákimdiginiń resmı saıty.
Mundaı quqyq buzýshylyqtar úshin kózdelgen jaýapkershilik týraly elordalyq Kommýnıkatsııalar qyzmetinde ótken brıfıngte Astana qalasy Saraıshyq aýdany prokýratýrasynyń bólim prokýrory Móldir Joldasova aıtyp berdi
Onyń aıtýynsha, bul QR Ákimshilik quqyq buzýshylyq týraly kodeksiniń 608-baby jáne Qylmystyq kodekstiń 345-1, 346-baptary mundaı áreketter úshin ákimshilik jáne qylmystyq jaýaptylyqty kózdeıdi.
Quqyq buzýshylyqtyń sıpaty men saldaryna qaraı ákimshilik qamaqqa alý, kólik quralyn basqarý quqyǵynan aıyrý jáne bas bostandyǵynan aıyrý túrindegi jazalar taǵaıyndalýy múmkin. Zańda kózdelgen jaǵdaılarda kólik quralyn basqarý quqyǵynan ómir boıyna aıyrý jazasy da qoldanylady.
— Elordada masań kúıde kólik basqarǵan 40 jastaǵy turǵynǵa 15 táýlik ákimshilik qamaqqa alý jáne júrgizýshi kýáliginen 7 jylǵa aıyrý jazasy taǵaıyndalǵan. Taǵy bir jaǵdaıda masań kúıde qarsy qozǵalys jolaǵyna shyǵyp, jol-kólik oqıǵasyn jasaǵan júrgizýshi 8 aıǵa bas bostandyǵynan aıyrylyp, kólik basqarý quqyǵynan 10 jylǵa aıyrylǵan. Al buryn júrgizýshi kýáliginen aıyrylǵan, esirtkilik masań kúıde qaıta kólik basqarǵan azamatshaǵa 1 jyl bas bostandyǵynan aıyrý jáne kólik basqarý quqyǵynan ómir boıyna aıyrý jazasy taǵaıyndalǵan, — dedi spıker.
Móldir Joldasovanyń sózinshe, quqyq qorǵaý organdary jol qozǵalysy erejeleriniń saqtalýyn baqylap, profılaktıkalyq jáne reıdtik is-sharalar júrgizedi.
— Alaıda qaýipsizdik ár júrgizýshiniń jeke jaýapkershiliginen bastalady. Azamattardy masań kúıde kólik basqarmaýǵa, zań talaptaryn saqtaýǵa jáne jol qozǵalysyna qatysýshylardyń ómiri men densaýlyǵyna jaýapkershilikpen qaraýǵa shaqyramyz. Eshbir sapar adam ómirinen qymbat emes, — deıdi Astana qalasy Saraıshyq aýdany prokýratýrasynyń bólim prokýrory.
Buǵan deıin Qyzylorda qalalyq polıtsııa basqarmasynyń krımınaldyq polıtsııa bólimi kóshede balaly áıeldi qaǵyp ketip, sábı ólimine sebep bolýy múmkin kúdiktige izdeý jarııalady.
