Astanada mas kúıde polıtseılerge kúsh qoldanǵan er adam sottaldy
ASTANA. KAZINFORM — Elordada polıtseılerge qarsy kúsh qoldanǵan er adamǵa úkim shyqty, dep habarlaıdy qalalyq prokýratýranyń baspasóz qyzmeti.
Astanadaǵy turǵyn úılerdiń biriniń aýlasynda alkogoldik masań kúıde bolǵan er adam polıtsııa qyzmetkerleriniń zańdy talaptaryna baǵynbaı, olarǵa balaǵat sózder aıtqan. Budan bólek, ar-namysy men qadir-qasıetin qorlaǵan, sondaı-aq qarsylyq kórsetip, olarǵa qatysty kúsh qoldanǵan. Quqyqqa qarsy áreketterdiń saldarynan polıtsııa qyzmetkerlerine densaýlyqqa zııan keltirmeıtin dene jaraqattary keltirildi.
Memlekettik aıyptaýshy sotta sottalýshynyń kinásin tolyq dáleldeıtin jetkilikti aıǵaqtar usyndy. Sot otyrysynda ol óz kinásin tolyq moıyndap, jasaǵan isine ókinetinin bildirdi.
— Sot úkimimen azamat kináli dep tanylyp, oǵan 3 jyl merzimge bas bostandyǵynan aıyrý jazasy taǵaıyndaldy. Úkim zańdy kúshine endi, — delingen habarlamada.
Qala prokýratýrasy bılik ókilderin qorlaý jáne quqyq qorǵaý organdary qyzmetkerlerine qatysty kúsh qoldaný qylmystyq jaýaptylyqqa ákep soǵatynyn eske salyp, azamattardy zań talaptaryn saqtaýǵa shaqyrady.
Eske salsaq, jaqynda Óskemende polıtseıdiń qarýyn tartyp alyp, oq atqan kúdiktiler ustalǵany belgili boldy.
Osydan buryn ІІM orynbasary Sanjar Ádilov polıtsııaǵa shabýyl jasaý faktilerine qatysty pikir bildirdi.
