Astanada Mańǵystaý oblysynyń mádenı kúnderi bastaldy
Astanada 7-9 qarasha kúnderi «Mańǵystaýdan myń sálem, Alash tóri» atty Mańǵystaý oblysynyń mádenı kúnderi ótedi. Elorda tórinde mańǵaz mekenniń mádenı jaýharlary jurtshylyq nazaryna usynylady. Úsh kún boıy ólke ónerpazdary óner kórsetedi, dep habarlaıdy Kazinform.
Mádenı-rýhanı is-sharalar aıasynda astanalyqtarǵa arnap teatr qoıylymdary sahnalanyp, Mańǵystaýdyń maqamdy jyr-dastany, óńir ónimderiniń kórme-jármeńkesi, sondaı-aq ádebı-sazdy keshter men saltanatty jıyndar uıymdastyrylady.
«Mádenıet – dúnıeniń qan tamyry. Rýhanııatsyz adam balasy ómir súre almaıdy, qoǵam bolmaıdy. Mańǵystaýdyń mádenı kúnderi birazdan beri Saryarqa tórinde ótpegen edi. Bul rýhanı tamyrymyzǵa jan bitiretin is-shara bolatyn shyǵar dep oılaımyz. Onyń ishinde «Mahamy múshhúr Mańǵystaý» degen keremet joba bar. Birinshi ret úlken sahnada oryndalady», - dedi aqyn Svetqalı Nurjan.
«Mańǵystaýdan myń sálem, Alash tóri!» Mańǵystaý oblysynyń Astana qalasynda ótetin kúnderiniń baǵdarlamasy boıynsha 7-8 qarashada saǵat qýyrshaq teatrynyń balalarǵa arnalǵan qoıylymdary, «Qubylý» spektakli sahnalanady. «Maqamy máshhúr Mańǵystaý» kúı keshi ótedi. Mańǵystaý ónimderiniń kórme-jármeńkesi uıymdastyrylady. «Mańǵystaý – ulttyq qundylyqtar qundaqtalǵan meken» rýhanı is-sharasy ótedi.
Á.Kekilbaıuly atyndaǵy Mańǵystaý oblystyq tarıhı-ólketaný mýzeıiniń arheologııa, Mańǵystaý qazaqtarynyń HH ǵasyrdaǵy ulttyq kıim úlgileri kórmesi, N.Muhanovtyń «Kúmbirleıdi kúmister» kollektsııasynan kórme jáne qolónershi Aldabergen Tilenbaevtyń súıekten jasalǵan kartınalarynyń kórmesi ótedi.
Sondaı-aq 8 qarashada Mańǵystaý oblysynyń Astana qalasyndaǵy mádenı kúnderiniń ashylý saltanatynyń gala-kontserti ótedi.
9 qarashada «Aqıyq ólke, alǵı-jyr» atty mańǵystaýlyq aqyn-jazýshylardyń ádebı sazdy keshi ótedi. «Qorǵansyzdyń kúni» spektakli qoıylady. «Mereıli meken – Munaraly Mańǵystaý» atty Abyl Taraquly atyndaǵy qazaq orkestriniń kontserti, Mańǵystaý kúnderiniń jabylý saltanaty josparlanǵan.
