Astanada Mańǵystaý oblysynyń kreatıvti jármeńkesi ótti
ASTANA. KAZINFORM — Astanadaǵy Qazaq Creative Hub ortalyǵynda Creative Aimaq jobasy aıasynda «Mańǵystaý: Tamyr. Talǵam. Kreatıv» atty eki kúndik jármeńke bastaldy.
Elordaǵa Mańǵystaý oblysynan kreatıvti ındýstrııanyń 40 ókili keldi. Olar óńirdiń mádenı murasy men shyǵarmashylyq áleýetin tanytatyn sándik-qoldanbaly óner buıymdaryn, dızaınerlik kıim toptamalaryn jáne avtorlyq jobalaryn kópshilikke usyndy.
Alǵashqy kúni «Túp tórkiniń tórge ozdyrǵan Mańǵystaý» kórmesi ótip, «Aqshaǵyl» ansambli óner kórsetti. Mádenı baǵdarlama «Dúnıe dıdaryndaǵy dástúr» sán kórsetilimimen, «Meniń álemim» mýzykalyq-poezııalyq qoıylymymen jalǵasty. Sondaı-aq Tamara Asar án shyrqap, «Jorǵa» bı ansambliniń ónerpazdary bı bıledi. Taqyryptyq sheberlik sabaqtary da uıymdastyryldy.
Mádenıet jáne aqparat mınıstrligi málimetinshe, jármeńke óńirlerdegi shyǵarmashylyq jobalardy tanytýǵa, otandyq óndirýshilerdi qoldaýǵa jáne kreatıvti kásip ıeleriniń ónimderin keńinen nasıhattaýǵa baǵyttalǵan.
1 qarashada, «Babanyń kózi, jańanyń ózi» sán kórsetilimi, «Dombyra sazy» ansambliniń kontserti, dástúrli mýzyka keshi jáne «Tamyr. Áýen. Rýh» kontserti ótedi.
Jármeńke Astana qalasy, Joshy han kóshesi, 16/2 mekenjaıyndaǵy Qazaq Creative Hub ortalyǵynda ótip jatyr.
Aıta keteıik, Astanada 31 qazan kúni Aqmola oblysynyń aýyl sharýashylyǵy jármeńkesi ótti.
