Astanada mánerlep kólik júrgizýden jarys ótedi
ASTANA. 24 shilde. QazAqparat - 27 shilde kúni Elordalyq «Qazaqstan» sport saraıynyń turaǵynda mánerlep júrdek kólik júrgizýden TMsport Kýbogy ótedi. Bul týraly astana.kz saıty habarlaıdy. Saıttyń jazýynsha, jarysqa elimizdiń úzdik shabandozdary qatysady.
Jarysty Astana qalasy ákimdiginiń qoldaýymen TRI MIRA RacingTeam komandasy, Qazaqstan Respýblıkasynyń Avtomotosport Federatsııasy uıymdastyryp otyr.
Dodaǵa qatysý úshin kólik áýesqoılaryna júrgizýshi kýáligi, QR AMSF bıyl bergen «D» jáne «E» sanatyndaǵy júrgizýshiniń qoldanystaǵy sertıfıkaty, medıtsına mekemeleriniń ruqsaty, saqtandyrý polısi qajet. Ár qatysýshy ótinish berip, jarys ótkiziletin ýaqytqa jaýapkershilik týraly qolhat jazady.
«Jarysqa djıp jáne shaǵyn avtobýstardan basqa tehnıkalyq baıqaýdan ótken kez kelgen markaly kólik qatysa alady. Onyń qozǵaltqyshynyń kólemine shekteý qoıylmaıdy. Jarys artqy, aldyńǵy jáne tolyq jetektegi avtomobılder arasynda úsh synyp boıynsha ótkiziledi», - dep habarlady uıymdastyrýshylar.
Erejege sáıkes, jarys bastalǵan soń 2 avtomobıl qatar júredi. Baqylaýshy týrlarda ár qatysýshyǵa eki múmkindikten beriledi, onyń eń úzdigi esepke alynady. Fınalǵa ár synyp boıynsha 1-8-oryn alǵan júrgizýshiler ótedi.
Jeńimpazdarǵa demeýshilerdiń atynan estelik syılyqtar, dıplomdar, medaldar men aqshalaı syıaqylar beriledi.
