Astanada mańdaıshalar men nusqaǵyshtardy aýystyrý, aqparat jańartý jumysy júrip jatyr

ASTANA. QazAqparat - Astana qalasy ákiminiń baspasóz hatshysy Aqmaral Oljabaeva qala turǵyndaryna málimdeme jasady, dep habarlaıdy QazAqparat.

«Qurmetti qala turǵyndary men qonaqtary! Ózderińiz biletindeı, el astanasynyń ataýyn Nur-Sultannan Astana etip ózgertý týraly Memleket basshysynyń Jarlyǵy kúshine endi. Qalada mańdaıshalardy, nusqaǵyshtardy, aqparattyq pannolardy jáne basqalaryn aýystyrý jumysy júrip jatyr. Qujat aınalymy elektrondy formatta júretinin eskere otyryp, aqparattyq derekqorlarǵa tıisti ózgerister engiziledi. Sol sııaqty ákimdiktiń, basqarmalardyń resmı resýrstarynda jáne vedomstvolyq baǵynysty uıymdardyń saıttarynda da derekter jańartylady»,- dep jazdy Aqmaral Oljabaeva Facebook paraqshasynda.

Onyń aıtýynsha, mańdaıshalardy, nusqaǵyshtardy aýystyrý, aqparatty jańartý jáne basqa jumystar josparly túrde júrgizile bermek.

Ádilet mınıstrligi málim etkendeı, osyǵan baılanysty elorda turǵyndary úshin qujattardy aýystyrýdyń esh qajeti joq, qujattar olardyń qoldaný merzimi aıaqtalǵan kezde óz kezegimen ózgeredi.