Astanada mamyr merekelerine oraı 200-den astam shara ótedi
Astana qalasy Mádenıt basqarmasynyń habarlaýynsha, 10 sáýir men 10 mamyr aralyǵynda elordamyzda túrli mádenı baǵdarlamalar uıymdastyrylady, astanalyqtar men qala qonaqtary kontsertter, kórmeler men teatr qoıylymdaryna bara alady. Merekelerge oraı Astanada patrıottyq aktsııalar, eskertkishterge gúl shoqtaryn qoıý rásimderi, halyqtyq serýender de keńinen ótkiziledi. Jalpy, qalada túrli deńgeıdegi 200-den astam shara, sonyń ishinde 35 iri mádenı shara ótpek. Qazaqstan halqynyń birligi kúnin atap ótý aıasynda elordada «Báıterek» monýmenti, «Stýdenttik», «Ǵashyqtar» saıabaqtarynda, qalalyq ákimdik aldyndaǵy alańda, Esil ózeniniń jaǵalaýynda jáne «Jastar» saraıynyń aldynda halyqtyq serýender uıymdastyrylady. Aımaqtyq etnomádenı birlestikter de ózderiniń shyǵarmashylyq ónerlerin ortaǵa salady. 1 mamyr kúni kontserttik baǵdarlama saǵat 11:00-23:00 aralyǵynda ótip, otshashýmen aıaqtalady. Atap aıtqanda, túngi otshashý Esil ózeniniń jaǵalaýynda, «Han Shatyr» SOO aýmaǵynda, «Arman» dúkeniniń mańyndaǵy «Jas batyr» stadıonynda, «Music hall» meıramhanasynyń janynda jáne Abylaı han dańǵyly men Pýshkın kóshesiniń qıylysyndaǵy gúlzarda uıymdastyrylady.
