Astanada mamyr aıynda jýrnalısterdiń halyqaralyq sammıti ótedi
Ol álemdik daǵdarys kezindegi jýrnalıstıkanyń róli, medıadaǵy ınnovatsııa men tehnologııalar, ekonomıkalyq kórsetkishtermen jumys jasaý jáne aqparat taratýdyń jańa ádisteri jónindegi máselelerdi kóterýge baǵyttalǵan, dep habarlady uıymdastyrýshylar. Sammıtke ataqty medıa-tulǵalar, blogerler, halyqaralyq medıa-holdıngter, ındýstrııanyń ǵylymı qaıratkerleri qatysady dep kútilýde. Jýrnalıstıkanyń halyqaralyq sammıtinde ótetin sharalardyń biri - «Jańa medıa-tehnologııalar men ekonomıkalyq máselelerdi jarııalaýdaǵy materıaldardy paıdalanýdyń ınnovatsııalyq negizderi» taqyrybyndaǵy «G-Global» syılyǵy. Bul syılyqqa sheteldik jáne otandyq medıa-holdıngter, korporatsııalar, medıa-tehnologııany jasaýshylar, ІT-kompanııalar, táýelsiz jýrnalıster qol jetkize alady. Baıqaý qorytyndysy boıynsha tyń baǵdarlamalar, quraldar, jańa tehnologııalar arqyly ekonomıkalyq aqparatty tıimdi taratyp, álemdik qaýymdastyqtaǵy ekonomıkalyq problemalarǵa aýdıtorııanyń qyzyǵýshylyǵyn arttyratyn úzdik jýrnalıstik joba anyqtalady. VII Astana ekonomıkalyq forýmynda ótetin marapattaý rásiminde jeńimpazǵa 15 000 dollar kólemindegi syıaqy tabystalady. Sondaı-aq, ǵalamdyq jýrnalıstıka salasyndaǵy aqparat almasý men sońǵy tehnologııalardy tanystyrý úshin sammıt aıasynda «Sheksiz aqparat» halyqaralyq medıa-kórmesi ótedi. Kórme álemdik jetekshi medıa-holdıngterdiń, ındýstrııanyń tájirıbeli ǵylymı qyzmetkerleriniń basyn qospaq.
