Astanada MÁMS-tiń 80 mln teńgesin jymqyrǵan eki adam sottaldy

ASTANA. KAZINFORM – Astana qalasynyń qylmystyq ister jónindegi aýdanaralyq soty alaıaqtyq jasady dep aıyptalǵan eki azamatqa qatysty aıyptaý úkimin jarııalady.

Sottyń anyqtaýynsha, N. «JShS» medıtsınalyq uıymynyń quryltaıshysy bola otyryp, 2023 jylǵy sáýir men shilde aılary aralyǵynda Mindetti áleýmettik medıtsınalyq saqtandyrý qorynyń qarajatyn jymqyrý maqsatynda azamattardy óziniń medıtsınalyq uıymyna jalǵan tirkeýdiń zańsyz shemasyn uıymdastyrǵan.

Qylmystyq nıetin júzege asyrý úshin N. «Ulttyq densaýlyq saqtaýdy damytý ǵylymı ortalyǵy» Astana bólimshesiniń mamany A.-ǵa aqshalaı syıaqy úshin azamattardy tirkeý jónindegi jalǵan ótinishterdi zańsyz maquldap, bekitýdi usynǵan. A. bul usynysqa kelisip, óziniń qyzmettik jaǵdaıyn paıdalana otyryp, jalǵan ótinishterdi bekitken.

- Nátıjesinde «JShS» medıtsınalyq uıymyna 15 myńnan astam azamat jalǵan túrde tirkelip, bul MÁMS qorynyń qarajatyn zańsyz alýǵa ákep soqqan. Mamandardyń qorytyndysyna sáıkes, qorǵa shamamen 80 mln teńge kóleminde asa iri mólsherde zalal keltirilgen. Onyń ishinde 7,5 mln teńge A.-nyń tikeleı áreketterinen kelgen materıaldyq zalaldy quraıdy. Zańsyz alynǵan qarajat N. men A. arasynda bólingen.

Atalǵan áreketter QR Qylmystyq kodeksiniń 190-babynyń 4-bóliginiń 2-tarmaǵy jáne 190-babynyń 3-bóliginiń 1-tarmaǵy boıynsha saralandy, - dep jazdy Astana sottarynan.

Sot jaryssózinde prokýror N.-ny 5 jylǵa, al A.-ny 2 jyl 8 aıǵa bas bostandyǵynan aıyrý jazasyn taǵaıyndaýdy surady. Sottalýshylar kinálaryn tolyq moıyndady, qorǵaý tarapy shartty jaza qoldanýdy ótindi. Olardyń kinási moıyndaý kórsetýlerimen, jábirlenýshi men kýálardyń aıǵaqtarymen, sondaı-aq maman qorytyndysymen dáleldendi.

Sot jeńildetetin mán-jaılar retinde kámeletke tolmaǵan balalarynyń bolýyn, kináni moıyndaýdy, shyn júrekten ókinýdi jáne buryn sottalmaǵanyn eskerdi. Aýyrlatatyn mán-jaılar anyqtalǵan joq.

Jasalǵan qylmystyń sıpaty men aýyrlyǵyn, sondaı-aq asa iri mólsherdegi zalaldyń ótelmegenin eskere otyryp, sot N.-ǵa ortasha qaýipsizdik mekemesinde jazasyn óteý arqyly 5 jylǵa bas bostandyǵynan aıyrý jazasyn taǵaıyndady.

Al A.-ǵa 3 jylǵa bas bostandyǵynan aıyrý jazasy belgilenip, amnıstııa týraly zań negizinde jaza merzimi besten bir bólikke qysqartyldy. Túpkilikti túrde oǵan ortasha qaýipsizdik mekemesinde 2 jyl 4 aı merzimge bas bostandyǵynan aıyrý jazasy taǵaıyndaldy.

Úkim zańdy kúshine engen joq.

Aıta keteıik, Astanada eki jekemenshik klınıkanyń basshysy MÁMS-ten 682 mıllıon teńge jymqyrdy degen kúdikke ilindi.