Astanada mamandyqty tegin alýǵa bolatyn kýrstar tizimi bekitildi
ASTANA. QazAqparat - Astana qalasy ákimdiginiń jumyspen qamtý máselesi boıynsha vedostvoaralyq komıssııasy tehnıkalyq jáne kásiptik bilimi bar kadrlardy daıarlaý úshin eńbek naryǵyn eskere otyryp, tegin oqytylatyn kýrstardyń tizimin bekitti, dep habarlaıdy QazAqparat elorda ákimdiginiń resmı saıtyna silteme jasap.
Atap aıtqanda, elektrgazdánekerleýshi, slesar-santehnık, naýbaıshy, kondıter, tiginshi, esepshi jáne taǵy basqa mamandyqtar bıýdjet esebinen oqytylatyn bolady.
Sondaı aq shara barysynda «saýda menedjeri» mamandyǵy jáne kompıýterlik saýat ashý daǵdylary boıynsha qysqa merzimdi oqytý kýrstaryn uıymdastyratyn bilim berý uıymdary anyqtaldy. Barlyǵy ózderiniń múmkindikterin 5 oqytý uıymy men kolledjderdiń ókilderi tanystyrdy. Nátıjesinde komıssııa músheleri 3 bilim berý uıymyn iriktep aldy. Olar - «Eýrazııa gýmanıtarlyq ınstıtýtynyń kolledji»i, «Astana qalasy menedjment jáne bıznes kolledji» JShS jáne «ASÝ» Gýmanıtarlyq tehnıkalyq kolledji».
Vedomstvoaralyq komıssııa quramyna qalalyq maslıhat depýtattary, Halyqty jumyspen qamtý, eńbek jáne áleýmettik qorǵaý, bilim berý, kásipkerlik jáne ónerkásip, ekonomıka jáne bıýdjettik josparlaý basqarmalarynyń, Halyqty jumyspen qamtý ortalyǵynyń jáne Astana qalasy boıynsha Kásipkerler palatasynyń ókilderi kiredi.
Eske sala keteıik, 2017 jyly Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy aıasynda TjKB mamandyqtary boıynsha 1050 adamdy tegin kásibı oqytýmen qamtý kózdelgen. Odan basqa, resmı jumyssyz retinde tirkelgen 500 adam daıarlaý jáne qaıta daıarlaý kýrstarynan ótpek.
