Astanada mamandar tazynyń shapshańdyǵyn, tóbettiń batyldyǵyn baǵalady (FOTO)
ASTANA. QazAqparat - Búgin Aqmola oblysy, Arshaly aýdanynyń Jibek joly aýylynda qazaq tazysy men asyl tuqymdy qazaqy tóbetterdiń birinshi respýblıkalyq kórmesi men baıqaýy ótti. Igi shara Qazaq handyǵynyń 550 jyldyǵyna arnalǵan.
Qazaqtyń tazysy men tóbetteriniń asyl tuqymyn saqtaý, olardy nasıhattaý maqsatynda ótkiziletin osy aýqymdy is-sharany «Qansonar» ańshylardyń qoǵamdyq birlestikteri men ańshylyq sharýashylyǵy sýbektileriniń respýblıkalyq qoǵamdastyǵy Aqmola oblystyq ákimdigimen birlesip uıymdastyrdy. Qazaq tazysy men asyltuqymdy qazaqy tóbetterdiń birinshi respýblıkalyq kórmesine Qazaqstannyń barlyq óńirinen 40 tazy, 20 tóbet ákelingen. Ańshylyq kezinde tazylar ańdy qýyp júrip ustaıtyndyqtan, olar saǵatyna 90 km shapshańdyqpen júgiretin bolǵan. Adamdar tazylardy qoıan men túlkige, keıde qasqyrǵa da salady. Biraq qasqyr ıtten óktem keltindikten, ıtterdiń bári birdeı qasqyrǵa shaba bermegen. Mundaıda kóbinde «uıalas» bóribasar, tóbetter qasqyrǵa batyl shabatyn bolǵan. Sol úshin azýly tóbetterdi, kúshti tazylardy qasqyr alýǵa arnaıy baýlıdy eken. Búgingi baıqaýda mine, osyndaı naǵyz tóbetterdiń batyldyǵyn qasqyrǵa salyp synasa, tazylardyń júıriktigin 250 metrge júgirtkizip baǵalady. «Biz bıylǵy jyly Qazaq handyǵynyń 550 jyldyǵyna arnalǵan úlken dúbirli toıdy atap ótip jatyrmyz. Toıdyń qamtyıtyn aýqymy da anaǵurlym keń. Qazaq ultynyń ótken tarıhy men dástúrli mádenıetinde orny bar barlyq qundylyqtarymyzdy osy toıda kórsetýimiz kerek. Mine, solardyń biri qazaqtyń turmys saltynda kórinis tapqan, ańshylyqta, mal baǵýda keńinen paıdalanǵan júıirik, alǵyr tazylar men qotandy kúzetetin dáý tóbetterdiń orny erekshe dep oılaımyn. Burynǵy handarymyz da saıatshylyqqa osy tazylardy ertip shyqqan ǵoı. Búgingi kúni sol atalarymyz jeti qazynanyń birine jatqyzǵan qazaqy ıtterdiń sanynyń sırep bara jatýy, barynyń ózi basqa tuqymdaǵy ıttermen býdandasyp qanyn buzyp, ózgerip jatýy bizdi oılandyrýy kerek. Aldaǵy ýaqyttarda bul ıtterdiń sanyn molaıtyp, taza qandy tóbetter men tazylardy anyqtap shyǵý úshin obylystarda osy sııaqty baıqaýlardy jalǵasty uıymdastyratyn bolamyz», - deıdi «Qansonar» ańshylardyń qoǵamdyq birlestiginiń basqarma tóraǵasy Oralbaı Ábdikárimov. Baqytjol Kákesh
