Astanada «Maqtanym, tiregim - otbasym» atty ónegeli otbasy ókilderimen kezdesý ótedi

Іs-sharanyń maqsaty bıyl elimizde alǵash ret atalyp ótkeli otyrǵan 1 jeltoqsan - Tuńǵysh Prezıdent kúni merekesi qarsańynda Elbasymyz N.Á.Nazarbaevtyń júrgizip otyrǵan memlekettik otbasylyq-demografııalyq saıasatyna qoldaý kórsetý bolyp tabylady. Bul týraly Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasynyń hatshylyǵy  habarlady.

Kezdesýge Qazaqstan  Respýblıkasy  Prezıdentiniń keńesshisi, Ulttyq komıssııanyń tóraıymy G.N.Ábdiqalyqova qatysady. Sondaı-aq, tanymal qoǵam jáne memleket qaıratkerleri shaqyrylǵan.

Elimizde memleket tarapynan árbir qazaqstandyq otbasy men árbir qazaqstandyq­tyń ómirine shynaıy sezinerlikteı oń ózgerister ákelýge baǵyttalǵan naqty qadamdar jasalýda. Endigi kezek - azamattardyń ózinde, árqaısymyzdyń sol bastamalardy ilgeriletýge úles qosýymyzda. Bul kezdesý qoǵamnyń ár múshesiniń otbasy ınstıtýtyn qoldaý úshin óz deńgeıinde eńbek ete alatynyn kórsetýge arnalǵan.

Kezdesýdiń basty keıipkerleri - Qazaqstannyń túkpir-túkpirinen kelgen, Otanymyzdyń órkendeýine eńbegimen de, ónegeli ul-qyzymen de úles qosyp júrgen ata-analar - «Otbasym» jýrnalynda jarııalanǵan materıaldardyń keıipkerleri. Otbasylyq qundylyqtardy nasıhattaý úshin naqty adamdar ómirin ónege ete otyryp, kezdesý keıipkerleriniń otbasylyq tárbıe, áke men anany qadirleý, sapaly, sanaly urpaq ósirý boıynsha  ómirlik tájirıbeleri nasıhattalyp, qurmet kórsetiledi. Sondaı-aq jas urpaqtyń boıyna ósken uıasyn qasterleý, ul-qyzy úlgi tutar ata-ana bolý sezimin darytý kózdeledi. 

Bul sharany uıymdastyrýǵa  «Otbasym» jýrnalynyń redaktsııasy, Qazaq ulttyq óner ýnıversıteti, Birikken Ulttar Uıymynyń Damý baǵdarlamasy qatysýda.