Astanada Mahatma Gandıge eskertkish ornatý usynyldy

ASTANA. QazAqparat - Astanada kóshe nemese mektepterdiń birine Úndistannyń kórnekti saıası jáne qoǵam qaıratkeri Mahatma Gandıdiń esimin berý usynyldy, dep habarlaıdy QazAqparat elorda ákimdigine silteme jasap.

Mundaı usynys Astana ákimi Baqyt Sultanovtyń Úndistannyń Tótenshe jáne ókiletti elshisi Prabhat Kýmarmen kezdesýi barysynda aıtyldy.

«Osy jyly biz 2020 jyldyń 2 qazanyna deıin jalǵasatyn Mahatma Gandıdiń 150 jyldyǵyn merekeleýge arnalǵan sharalar tsıklin bastaımyz. Almaty qalasynda onyń qurmetine qoıylǵan kóshe men eskertkish bar. Eger Astana ákimdigi de álem tarıhynda óziniń tereń izin qaldyrǵan Gandıdiń esimin máńgilik etý ıdeıamyzdy Qazaqstan astanasynda da qoldasa, qýanar edik», - dedi P. Kýmar. 

Bul rette, Elshi Astana kósheleriniń nemese mektepteriniń birine Gandıdiń esimin berýdi nemese onyń qurmetine eskertkish ornatýdy usyndy. P. Kýmar eskertkish ornatylatyn jaǵdaıda onyń daıyndalýy men jetkizilýi úndistandyq taraptan júzege asyrylatynyn atap ótti.

Astana ákimi Elshiniń aıtqan usynysyna qyzyǵýshylyq bildirip, aldaǵy ýaqytta osy jáne ózge de jobalar boıynsha birlesip jumys isteýge daıyn ekendigin jetkizdi. 

Taraptar sondaı-aq Astanada úndi saýda-iskerlik ortalyǵynyń qurylysyn salý múmkindigin, mádenı sharalardy birlesip uıymdastyrýdy jalǵastyrý syndy máselelerdi talqylady. Budan bólek, B. Sultanov Halyqaralyq qarjy ortalyǵynyń ashylýyna baılanysty bıznes júrgizýdiń jańa perspektıvasy baryn aıtyp, úndi kásipkerlerin Astananyń ınnovatsııa, aqparattyq tehnologııa, bilim jáne densaýlyq sııaqty salalaryna ınvestıtsııa quıýǵa shaqyrdy.