Astanada «Mádenıet jáne ınnovatsııa» respýblıkalyq forýmy ótedi
ASTANA. KAZINFORM — 2026 jylǵy 19-21 mamyr aralyǵynda Astanada Mádenıet jáne óner qyzmetkerleri kúnine oraı «Mádenıet jáne ınnovatsııa» respýblıkalyq forýmy uıymdastyrylady, dep habarlaıdy Mádenıet jáne aqparat mınıstrliginiń baspasóz qyzmeti.
Іs-sharaǵa elimizdiń barlyq óńirinen mýzeı, kitaphana, arhıv, mádenıet úıleri men ózge de sala uıymdardyń ókilderi jınalady. Forýmǵa sondaı-aq halyqaralyq jáne qazaqstandyq sarapshylar, bıznes qaýymdastyq ókilderi, kreatıvti ındýstrııa jáne tehnologııalyq kompanııalardyń mamandary qatysady.
— Bıylǵy forýmnyń basty ereksheligi — dástúrli oqytý formatynan naqty jobalar ázirleýge negizdelgen tájirıbelik jumysqa basymdyq berilýi. Qatysýshylar mádenıet uıymdaryn jańǵyrtýǵa, aýdıtorııa aıasyn keńeıtýge, jańa tehnologııalardy engizýge jáne seriktestik baılanystardy damytýǵa baǵyttalǵan bastamalar ázirleıdi, — delingen habarlamada.
Úsh kúndik forým baǵdarlamasy salanyń ózekti máselelerin talqylaýdan bastap, naqty jobalardy ázirlep, olardy tanystyrý kezeńine deıingi keshendi jumysty qamtıdy. Alǵashqy kúni saladaǵy transformatsııa úderisteri, tsıfrlandyrý, jasandy ıntellekt múmkindikteri jáne aýdıtorııamen ózara baılanys ornatýdyń jańa tásilderi qarastyrylady.
Ekinshi kúni qatysýshylar tájirıbelik formatta jumys istep, zamanaýı tsıfrlyq múmkindikterdi meńgerip, birlesken sessııalar barysynda mádenıet uıymdaryna arnalǵan jańa bastamalardy pysyqtaıdy. Sońǵy kúni komandalar óz jobalaryn sarapshylar nazaryna usynyp, óńirlerde júzege asyrýǵa usynylatyn úzdik sheshimder anyqtalady.
Forým aıasynda salaaralyq áriptestikti damytýǵa, jańa seriktesterdi tartýǵa jáne óńirlerdiń qajettiligine saı bastamalardy iske asyrýǵa aıryqsha nazar aýdarylady.
Osydan buryn Qazaqstan BUU forýmynda turaqty qalalardy damytý boıynsha tájirıbesin usyndy.
