Astanada mádenıet qaıratkerlerine memlekettik stıpendııa tapsyryldy
ASTANA. KAZINFORM – Elordada mádenıet salasyndaǵy memlekettik stıpendııany tabystaý rásimi ótti. Stıpendııany Memleket basshysynyń atynan Qazaqstan Respýblıkasy Premer-mınıstriniń orynbasary – mádenıet jáne aqparat mınıstri Aıda Balaeva tabys etti. Bul týraly Mádenıet jáne aqparat mınıstrliginiń baspasóz qyzmeti habarlady.
Ádebıet pen óner salasyndaǵy Prezıdenttik stıpendııa otandyq mádenıetti damytýǵa eleýli úles qosqan tulǵalarǵa beriledi. Memlekettik stıpendııa taǵaıyndalǵannan beri Qazaqstan rýhanııaty men ónerine eńbegi sińgen azamattar marapattaldy. Bıyl 75 adam memlekettik qoldaýǵa ıe boldy. Stıpendıattar qatarynda tanymal mádenıet maıtalmandary da, bolashaǵynan úmit kúttiretin daryndy jastar da bar.
Jyl saıyn taǵaıyndalatyn bul stıpendııa – memlekettiń mádenıet jáne óner qaıratkerlerine, shyǵarmashylyq qyzmetkerlerine jáne jas daryndarǵa qoldaýy men qamqorlyǵynyń aıǵaǵy. Sondaı-aq olardyń ult mádenıetin órkendetip, álemge tanytýǵa qosqan eleýli úlesine kórsetilgen qurmet.
Stıpendıattar qatarynda Jandarbek Málibekov, Merýert Ótekeshova, Roza Muqanova, Samal Eslıamova, Ermek Asylhanov, Qaırat Baıbosynov jáne ózge de mádenıet qaıratkerleri bar.
Sondaı-aq jas talanttarǵa da erekshe nazar aýdaryldy. Olardyń qatarynda opera ánshisi Marııa Mýdrıak, teatr aktrısasy Altynaı Nurbek, teatr jáne kıno akteri Bázil Sultanǵazy, aktrısa Ekaterına Maksım jáne basqa da óner ıeleri bar. Qazirdiń ózinde bul azamattar aıtarlyqtaı jetistikterge jetip, qazaqstandyq mádenıetti halyqaralyq deńgeıde nasıhattap júr.
Bul qoldaý ónerpazdardyń kásibı sheberligin arttyrýǵa, ulttyq murany saqtaýǵa, elimizdegi mádenıet jáne óner salasynyń damýyna yqpal etip qana qoımaı, tyń ıdeıalar men jobalardyń iske asýyna septigin tıgizedi.
Aıta keteıik, Qazaqstanda mádenıet salasy ókilderin qoldaýmen qatar, mádenı ınfraqurylymdy nyǵaıtý jáne shyǵarmashylyq múmkindikterdi keńeıtý boıynsha júıeli jumys júrgizilip keledi. Sońǵy 5 jylda mádenıet pen óner salasyn qarjylandyrý kólemi eki ese artty. El boıynsha 150-den astam jańa mádenıet nysany ashyldy, onyń ishinde 9 teatr, 18 mýzeı jáne 50-den astam kitaphana bar. Sonymen qatar 200 myń saqtaý birligine arnalǵan 4 aýdandyq memlekettik arhıv ǵımaraty salyndy. Budan bólek, 11 mádenıet uıymyna «Ulttyq», al 9 uıymǵa «Akademııalyq» mártebe berildi.
Ádebıetti damytý salasy da mańyzdy baǵyttardyń biri bolyp qala beredi. Bul salada 2023 jyly jas jazýshylar men aqyndardy qoldaý maqsatynda qurylǵan Prezıdenttik ádebı syılyq, sondaı-aq 2022 jyly taǵaıyndalǵan «Aıboz» ulttyq ádebı syılyǵy zamanaýı qalamgerlerdi tanytyp, shyǵarmalarynan nasıhattaýǵa múmkindik beredi. Búginde atalǵan ádebı syılyqtardy 40 adam ıelenip, memleket tarapynan qoldaý tapty.
Baspa isi salasy boıynsha da birqatar jumys atqaryldy. Atap aıtsaq, 2025 jyly taralymy 240 500 dana bolatyn 119 ataýly ádebı týynda jaryq kórdi. Kitaptar elimizdegi kópshilikke qoljetimdi kitaphanalarǵa taratyldy.
Sonymen qatar «Jumysshy mamandyqtar jyly» aıasynda eńbek adamdaryn kórkem shyǵarmalar arqyly nasıhattaýǵa arnalǵan «Erlik pen eńbek dastany» respýblıkalyq baıqaýy uıymdastyryldy.
Infraqurylymdy jańartý, shyǵarmashylyq qyzmetkerlerdi qoldaý eldiń biryńǵaı mádenı keńistigin nyǵaıtyp, Qazaqstandy halyqaralyq arenada mádenıeti men óneri arqyly tanytýǵa yqpal etedi.